17 cociñeiros que reúnen 44 estrelas Michelin participan nun evento gastronómico para realizar un tramo do Camiño
Debido á situción sanitaria, participarán 13 chefs menos que na pasada edición.
Por Europa Press / Redacción | SANTIAGO DE COMPOSTELA | 04/08/2021 | Actualizada ás 16:19
O evento gastronómico 'Estrelas Solidarias no Camiño de Santiago', que organizan o restaurante Casa Barqueiro e a Xunta, reunirá o 9 de agosto a 17 cociñeiros nacionais de prestixio --entre todos suman 44 estrelas Michelin-- para realizar un tramo do Camiño e reunirse no restaurante organizador, situado en Negreira.
Un dos propietarios de Casa Barqueiro, Rogelio Rial, participou este mércores no acto de presentación do encontro gastronómico xunto á directora de Turismo, Nava Castro, e ao director de Cáritas Santiago. O restaurador agradeceu tanto á Xunta como aos chefs asistentes a súa predisposición á hora de facilitar a organización do evento.
"O obxectivo do encontro é reforzar ao sector hostaleiro e turístico, sen perder de vista a situación sanitaria actual", recoñeceu Rial. Idea na que tamén redundou Nava Castro, quen asegurou que "a esixencia de coidar as condicións sanitarias debe ser máxima para poder celebrar o evento da mellor maneira".
O acto contará con menos cociñeiros que a edición de 2020. Dos 30 que participaron nesa edición, pasan aos 17 actuais. Aínda así, as entradas para a comida solidaria que se celebrará cos chefs en casa Barqueiro levan esgotadas varios días. Os asistentes poderán gozar de produtos agroalimentarios galegos de calidade.
