Estas son as recomendacións para a onda de calor que se achega

Ante a previsión da chegada dunha onda de calor esta semana que se prolongará, previsiblemente, ata o domingo, o Ministerio de Sanidade lembra as recomendacións sanitarias fronte ás temperaturas extremas e fai fincapé en que a calor está relacionada co agravamento de enfermidades previas e determinadas patoloxías.

Entre elas, atópanse o esgotamento ou golpe por calor e a insolación. O Ministerio subliña que é importante coñecer os síntomas destes problemas para actuar de forma rápida e efectiva e minimizar os riscos para a saúde. Así, os síntomas que indican que se pode padecer un esgotamento por calor abarcan desde a dor de cabeza, náuseas, mareos, vómitos, cansazo, sudoración, pel fría, pálida ou húmida, pulso rápido e débil, e febre menor de 40°C.

Ante esta sintomatoloxía, desde Sanidade lémbrase que se debe beber auga, permanecer nun lugar fresco, afrouxar a roupa, e aplicar panos húmidos ou duchas/baños de auga fría. Así mesmo, débese buscar atención sanitaria inmediata se se padecen enfermidades crónicas, se se teñen vómitos, ou se os síntomas empeoran ou duran máis dunha hora.

Doutra banda, ante síntomas que indiquen que se pode padecer insolación ou golpe de calor, como son pel quente e arroibada, respiración e pulso acelerado e forte, febre maior de 40°C, convulsións, alucinacións, irritabilidade ou cambios do comportamento e alteración do nivel de conciencia ou desmaio, o recomendable é porse en contacto inmediatamente co 112 e, mentres chega a axuda, manter á persoa nun lugar fresco, axudando a baixar a temperatura con panos fríos ou un baño/ducha de auga fría sen proporcionar nada de beber.

Cabe destacar que os efectos da calor non afectan a todo o mundo por igual. Os colectivos cun maior risco de sufrir os efectos das altas temperaturas son as persoas maiores, as mulleres xestantes, os lactantes e menores de 4 anos, as persoas con autonomía limitada, e aquelas que traballan ao aire libre.

Desde o Ministerio de Sanidade sublíñase unha serie de recomendacións xerais: beber auga e líquidos con frecuencia, aínda que non senta sede e con independencia da actividade física que se realice; evitar as bebidas con cafeína, alcol ou moi azucaradas, xa que poden favorecer a deshidratación; prestar especial atención a bebés e nenos e nenas pequenas, embarazadas ou nais lactantes, así como ás persoas maiores ou con enfermidades que poidan agravarse coa calor (como as enfermidades cardíacas, renais, diabetes, hipertensión, obesidade, cancro, patoloxías que dificultan a mobilidade, demencia e outras enfermidades mentais, así como o abuso de drogas ou alcol).

Desde o Ministerio tamén aconsellan permanecer o maior tempo posible en lugares frescos, á sombra ou climatizados, e refrescarse cada vez que se necesite; así como procurar reducir a actividade física e evitar realizar deportes ao aire libre nas horas centrais do día.

Outros consellos son usar roupa lixeira, folgada e que deixe transpirar; non deixar a ningunha persoa nun vehículo estacionado e pechado (especialmente a persoas menores de idade, maiores ou con enfermedadescrónicas); consultar a un profesional sanitario ante síntomas que se prolonguen máis dunha hora e que poidan estar relacionados coas altas temperaturas; manter os medicamentos nun lugar fresco, xa que a calor pode alterar a súa composición e os seus efectos e, por último, facer comidas lixeiras que axuden a repor os sales perdidos pola suor (ensaladas, froitas, verduras, zumes, entre outras).