Sanidade tras confinar por erro a 12 persoas en Vilagarcía: "Actuouse segundo o protocolo"
Alega "situacións organizativas que xorden da complexidade cotiá que implica a contención da pandemia".
Por Europa Press / Redacción | PONTEVEDRA | 12/08/2021 | Actualizada ás 13:18
A Consellería de Sanidade explicou este xoves que no confinamento por erro dunha ducia de persoas no municipio pontevedrés de Vilagarcía de Arousa a actuación do Servizo de Alertas Epidemiolóxicas "foi a indicada no protocolo da Dirección Xeral de Saúde Pública".
Nun comunicado de prensa, Sanidade explica que "continuará coordinando actuacións permanentes cos efectivos de rastrexo e asistenciais na contención da Covid-19 en Galicia, dando cobertura a aquelas incidencias que poidan xurdir".
En relación á "casuística" sucedida en Vilagarcía de Arousa o pasado fin de semana con persoa confinadas por erro, a Consellería aclara que "a actuación do Servizo de Alertas Epidemiolóxicas da Xefatura Territorial de Sanidade de Pontevedra foi a indicada no protocolo da Dirección Xeral de Saúde Pública".
RESULTADO NEGATIVO
Neste sentido, explica que "foi solicitada a comunicación do resultado negativo por correo electrónico" para "proceder, primeiro, a comprobar o resultado negativo no expediente médico e, posteriormente, a descartar o caso na aplicación informática seguindo o protocolo do 4 de agosto de 2021 onde, lembra, di "caso descartado: caso sospeitoso con PDIA negativa cando non hai unha alta sospeita clínico-epidemiolóxica".
Para "continuar xestionando no tempo calquera tipo de situacións organizativas que xorden da complexidade cotiá que implica a contención da pandemia", matiza Sanidade, a Consellería "continuará coordinando actuacións permanentes cos efectivos de rastrexo e asistenciais na contención da Covid-19 en toda Galicia", dando así "cobertura a aquelas incidencias que poidan acaecer a este respecto".
