Os veciños de Casalonga denuncian que a Xunta aproveita agosto para a expropiar a pista pública á canteira

A Plataforma Veciñal Casalonga Limpa de Residuos (PVCLR) denuncia a expropiación da vía pública que vai cara a antiga canteira mediante un plan de restauración presentado pola propietaria dos terreos, Toysal. Para as persoas que compoñen a PVCLR isto “é un atropelo, pois a mesma Dirección Xeral de Planificación Enerxética e Recursos Naturais recoñece no escrito que non ten competencias para dirimir a propiedade para logo asignarlla á concesionaria”.

Acusan que o plan de restauración “está cheo irregularidades, vagueades e inconcrecións”. Con el, a Xunta abre a posibilidade de que a empresa o modifique no futuro empregando a canteira de facto como vertedoiro, e asumindo que a administración terá que poñer cartos se esta desaparece de acordo coa lei 975/2009 de restauración de canteiras, aseguran da Plataforma. Consideran inviable que a administración leve adiante esa restauración coa cantidade irrisoria consignada como aval.

Desde o colectivo veciñal denuncian que a Dirección Xeral de Planificación Enerxética e Recursos Naturais “comandada por Paula Uría, a mesma que está a tramitar os plans eólicos”, fai pública a declaración en pleno mes de agosto, “cando pensan que ninguén mira, na mesma liña doutras accións semellantes levadas a cabo pola Xunta no pasado”.

Nunha nota de prensa enviada aos medios, os veciños da Plataforma sinalan que a Xunta recorre a unha serie de artificios legais para xustificar que a concentración parcelaria de San Xoán de Calo non vale. Isto senta un precedente “para a reclamación da devolución de centos de vías nunha situación semellante asignadas a outros propietarios nas diferentes concentracións parcelarias de Galicia”.

Ademais prohibe o tránsito aos veciños que “ían a pé pola antiga vía e obrígaos a percorrer 1 km máis pola beiravía dunha estrada con tránsito de coches e camións a altas velocidades”. Sobre a necesidade de expropiación, “simplemente dá por bo o argumento da empresa de que non pode realizar a actividade porque os veciños llo impiden, difamando así á veciñanza sen ningún tipo de proba”.

No que respecta á aprobación do plan de restauración consideran que hai vontade por parte da Xunta de axudar á empresa a “restaurar un oco mineiro gastando 25 céntimos por metro cadrado”, incluíndo o remodelado de noiros, traer terra do exterior, o acopio e sementeira da terra existente durante 30 anos, a eliminación das pistas e a plantación de arboreda.

Declaran tamén que a Xunta permite á empresa obviar a existencia de máis de 400.000 toneladas de residuos “o volume de catro Prestiges”, de procedencia descoñecida depositados na canteira nos últimos anos e implicitamente dálle cobertura legal para enterralos. Tamén se lle permite á empresa modificar ao seu gusto o perímetro a restaurar deixando fora as zonas que non lle interesan.

Por último, “dado que o plan obvia tamén a existencia da lagoa e do ecosistema establecido nela, a Xunta habilita á empresa a baleirala sen un plan de contención e protección das especies existentes”. Esta acción, sinalan, podería matar miles de peixes e anfibios que habitan nela e poñendo en risco a todas as especies de aves que habitan alí a día de hoxe.

Destacan que no caso de que algúns peixes puideran chegar ao Río Tinto “poderiamos falar mesmo dunha catástrofe ecolóxica, pois a maior parte son carpíns dourados, unha especie invasora que podería causar estragos neste afluente do Sar”.

Finalmente, a Plataforma lembra que hai dous meses “un por un, os veciños de Casalonga solicitaron ser recoñecidos como parte interesada no proceso” e que até hai uns días “a Xunta estivo a enviar respos-tas negativas, pechándolles así as portas a recorrer á vía administrativa”. Destacan que a Xunta está a “mofarse” da veciñanza ao indicar no escrito que “quen non estea de acordo pode recorrer a dita vía administrativa”.

Desde a plataforma promoveranse nos vindeiros meses novas accións de protesta “sinalando claramente aos culpables deste atropelo”. Por outra parte, a mesa xurídica da plataforma estuda xa o xeito de levar aos xulgados tanto o proceso como “as persoas que puideran incorrer en calquera tipo de responsabilidade, mesmo penal, relacionados con el”.