Feijóo inaugura este venres na Coruña o novo curso universitario, marcado pola máxima presencialidade
As tres institucións públicas contan cos seus protocolos ratificados e plans de continxencia en función da evolución da pandemia.
Por Europa Press / Redacción | SANTIAGO DE COMPOSTELA | 01/09/2021 | Actualizada ás 18:07
O arranque do curso nas tres universidades públicas galegas está ao virar a esquina. O presidente da Xunta, Alberto Núñez Feijóo, inaugurará este venres na Coruña o inicio deste novo período que as institucións educativas enfocan cun obxectivo central: lograr a máxima presencialidade posible en función da evolución da pandemia.
Aínda que a actividade académica non empezará oficialmente ata o luns, a Universidade da Coruña acollerá uns días antes o acto oficial de apertura que cada ano se celebra de forma rotatoria nunha das tres cidades. Feijóo será o encargado de inaugurar o curso xunto cos reitores da Coruña, Santiago e Vigo, Julio Abalde Alonso, Antonio López e Manuel Reigosa Roger, respectivamente, ás 12,00 horas no Paraninfo da Reitoría (A Maestranza). O decano da Facultade de Comunicación Audiovisual, Luís Hernández Ibáñez, será o encargado de impartir a lección inaugural co título 'Fantasía, xogo e outras realidades. O reto de facer visible a imaxinación'.
En todo caso, as universidades están preparadas para un novo curso marcado pola pandemia, con todos os protocolos actualizados e en función dos parámetros deseñados conxuntamente coa Consellería de Cultura, Educación e Universidade.
As medidas serán similares ás do ano pasado, en termos xerais, pero coas novidades respecto da redución da distancia interpersoal que estarán vixentes en todo o sistema, ademais de contar co avance do proceso de vacinación da poboación e do propio alumnado.
As universidades apostarán pola presencialidade, a distancia de seguridade de 1,2 metros, o uso obrigatorio de máscara e contarán con plans de continxencia nos que se incluirán diferentes escenarios de actuación en caso de brotes e en función da evolución da pandemia provocada pola covid-19.
MEDIDAS E RECURSOS
O conselleiro de Cultura, Educación e Universidade, Román Rodríguez, destacou hai uns días que o obxectivo é lograr "a maior normalidade posible" dentro da "máxima precaución", para o que pediu unha "implicación moi forte" dos equipos reitorais e de decanato. Estas medidas xa foran ratificadas pola UDC e a UVigo, e esta mesma semana foi a USC a que sacou unha resolución co protocolo adaptado á realidade universitaria da institución. A institución compostelá establece unha distancia de 1,2 metros nos niveis de risco medio-baixo e medio e de 1,5 en risco alto e máximo.
Tamén se manteñen prácticas como a distribución de materiais como máscaras e xeles ou a intensidade da ventilación nos mesmos termos que o pasado curso, aínda que se eliminarán as limitacións de mobilidade en centros e rexistros de estudantes en aulas e daráselle continuidade a liñas de axudas a bonos comedor, para desenvolvemento de docencia virtual ou préstamo de material informático. Doutra banda, manterase activo o 'Programa de Voluntariado COVID da USC', actualizaranse os protocolos de bibliotecas e contarase igualmente coa Unidade de Atención Psicolóxica.
O reitor, Antonio López, reivindicou "o exemplar cumprimento das normas" polos membros da comunidade universitaria, que permitiu desenvolver a actividade académica "coa maior normalidade posible" no contexto de pandemia. "De face ao curso que estamos a piques de empezar, pídovos a mesma exemplaridade no exercicio da responsabilidade individual", trasladou.
ADAPTACIÓN
Do mesmo xeito, as universidades da Coruña e de Vigo buscarán lograr a máxima presencialidade posible, a partir de diferentes escenarios que variarán en función do nivel de risco.
No caso de Vigo, a institución aprobou xa a finais de xullo en Consello de Goberno algunhas peticións de centros que solicitan impartir parte das materias sen presencialidade total en catro titulacións. En concreto, os grupos de grandes de materias obrigatorias e básicas dos graos da Facultade de Educación e Traballo Social, con docencia en liña; os teóricos da Facultade de Ciencias da Educación e de Deportes, con docencia sería mixta; e os teóricos de 2º e 4º curso do grao da Facultade de Química, tamén con formato mixto. Así mesmo, o Mestrado en Profesorado en Educación Secundaria Obrigatoria, Bacharelato, Formación Profesional e Ensino de Idiomas a docencia será semipresencial nas tres sedes.
Nesa mesma sesión, Manuel Reigosa aseguraba que a institución está preparada "para calquera escenario" e adaptarase en función da situación sanitaria.
