Un estudo do Centro Oncolóxico de Galicia sinala que o 99,4% dos vacinados xera elevados anticorpos
O nivel máximo de anticorpos foi decrecendo no 90% dos casos estudados ao longo do seis meses tras a inoculación.
Por Europa Press / Redacción | SANTIAGO DE COMPOSTELA | 09/10/2021 | Actualizada ás 12:23
Un estudo realizado a persoal voluntario do Centro Oncolóxico de Galicia (COG) recolle que o 3,6% xera anticorpos tras a primeira dose da vacina, mentres que tras a segunda dose detectáronse "niveis elevados de anticorpos" no 99,4%. De feito, só o 0,6% presentou un nivel "significativamente máis baixo".
Esta é a principal conclusión dunha investigación na que participou un grupo de 166 traballadores sanitarios (112) e non sanitarios (54) do COG, dos cales 39 son de sexo masculino e 124, do feminino.
Realizáronse varias mostraxes: tras administrárselle a primeira dose, antes da segunda e aos 14 días despois de completar a pauta. Esa mesma cuantificación volveuse a avaliar aos tres e aos seis meses, mentres que se realizará unha nova aos nove e aos doce meses.
O estudo, segundo explica o COG nun comunicado, tamén sinala que o nivel máximo de anticorpos foi decrecendo no 90% dos casos estudados ao longo do seis meses tras a inoculación, mesmo naqueles que tiveran probas positivas de SARS-CoV-2 e que foran tanto sintomáticos como asintomáticos.
Pola contra, no 10% dos restantes obsérvase un "aumento significativo" no nivel de anticorpos aos tres e ao seis meses con respecto a niveis anteriores. Neste sentido, o COG apunta que se "descoñece actualmente" a causa deste incremento: "Podería deberse a unha resposta tardía ou ben a unha reactivación ou reinfección" polo virus.
Así mesmo, a investigación aínda non permite saber cal é "o nivel desexable de produción de anticorpos e a súa duración no tempo" para considerar unha inmunización efectiva, posto que será un seguimento máis a longo prazo --as próximas mostraxes a nove e doce meses-- os que poderán achegar máis información.
