Feijóo destaca que Galicia é a segunda comunidade en recuperación de pernoctacións e terceira en viaxeiros
Enxalza o reforzo da rede pública do Camiño do Norte e o compromiso coa preservación do patrimonio cultural galego.
Por Europa Press / Redacción | SANTIAGO DE COMPOSTELA | 25/10/2021 | Actualizada ás 19:02
O presidente da Xunta, Alberto Núñez Feijóo, referiuse este luns ao novo albergue no Mosteiro de Santa María de Sobrado dos Monxes como exemplo do reforzo da rede pública do Camiño do Norte e da aposta polo coidado do patrimonio. Tamén puxo en valor a recuperación turística que evidencian os últimos datos estatísticos publicados no que respecta a pernoctacións e viaxeiros.
Durante unha visita, Feijóo resaltou que a reforma desta infraestrutura permitirá ofrecer aos peregrinos 98 prazas, ademais de lavandaría e zona de lecer, conservando ademais a singularidade do Camiño. "Uns peregrinos que contarán cun total de 10 albergues públicos con 405 prazas nesta ruta xacobea", sinalou, antes de lembrar que o albergue de Vilasantar estará listo en xaneiro de 2022.
Así mesmo, destacou que, nese compromiso co coidado dos bens singulares, a Xunta investiu case 1,5 millóns de euros na conservación e posta en valor do mosteiro. "E reforzaremos a aposta pola preservación do patrimonio cultural galego incrementando nos orzamentos de 2022 un 15% máis os fondos", agregou.
Nesta liña, o titular da Xunta aproveitou o acto para lamentar o cambio de criterio do Goberno central na repartición dos fondos destinados aos Bens de Interese Cultural, salvo que sexan de titularidade pública, e que deixa fóra a este mosteiro.
Ao longo da súa intervención, Feijóo subliñou que a Xunta seguirá apoiando o Camiño de Santiago, "unha das marcas máis importantes de Galicia", a través: da execución do Plan estratéxico do Xacobeo, dotado con 247 millóns, e preparando un novo Plan director dos Camiños 2022-2027.
Tamén, engadiu, "ampliando e mellorando a rede pública de albergues, que contará o próximo ano con 78; colaborando na súa volta á normalidade; e estando sempre á beira do sector, potenciando a campaña Galicia Destino Seguro".
MÁIS DE 160.000 PEREGRINOS CHEGARON A GALICIA XA
O presidente do Goberno galego concluíu destacando que, no que vai de ano, máis de 160.000 peregrinos chegaron a Galicia.
"E segundo os últimos datos de Turismo, entre xaneiro e setembro, chegaron á Comunidade 2,3 millóns de viaxeiros, con máis de 5 millóns de pernoctacións. Somos a segunda comunidade en recuperación de número de noites e a terceira en número de viaxeiros con respecto a 2019", salientou, para concluír que estas cifras acreditan que Galicia é "un bo lugar para descansar e para coñecer".
