A asamblea europea pola igualdade das linguas abordará a cuestión do galego na Lei do Audiovisual

O Museo do Pobo Galego, en Santiago de Compostela, acollerá entre os días 12 e 13 de novembro a Asamblea Xeral da Rede Europea pola Igualdade das Linguas (ELEN), que organiza a Mesa pola Normalización Lingüística. Nela participarán de maneira presencial 35 delegadas e delegados en representación de 47 linguas de 24 Estados europeos e  contará coa presenza virtual de Fernand de Varennes, relator especial para as minorías da Oficina do Alto Comisionado das Nacións Unidas para os Dereitos Humanos.

As delegadas e delegados de ELEN tratarán, entre outros temas, a cuestión do galego, do euskara e do catalán na Lei do Audiovisual do Estado; a crise en Francia despois da sentenza do tribunal constitucional sobre a Lei Molac; a Lei da Lingua Irlandesa nos 6 condados e a data na que chegará ao Parlamento británico; e o "fracaso xeral da Unión Europea para actuar en defensa das nosas linguas".

A Asamblea Xeral de ELEN contará  ademais na súa sesión inaugural, o venres 12 de novembro, coa actuación de Guadi Galego e coa presenza de personalidades do país e mais do resto de Europa, como Vesna Crnić-Grotić, presidenta do Comité de Expertos da Carta Europea para as Linguas Rexionais ou Minoritarias.

O secretario xeral de ELEN, Davyth Hicks, vén de agradecer a colaboración da Universidade de Santiago e do Museo do Pobo Galego na celebración da Asamblea Xeral en Galicia, “un país cun amplo movemento social que loita pola súa lingua e cunha entidade social de importancia vital como A Mesa pola Normalización Lingüística”.

A Rede Europea para a Igualdade das Linguas ten como obxectivo a promoción e protección das linguas europeas menos utilizadas, traballar no sentido de igualdade e ser unha voz para os falantes de linguas a nivel local, rexional, nacional, europeo e internacional. Representa 47 comunidades lingüísticas con 168 entidades de 23 Estados europeos e ten carácter de organismo consultivo do Parlamento Europeo, do Consello de Europa, das Nacións Unidas e da UNESCO. Forma parte, ademais, da Plataforma de ONG da Comisión Europea para Multilingüismo, a Plataforma de ONG para Cultura, a Plataforma de ONG para a Axencia de Dereitos Fundamentais da UE, e do Consello Económico e Social da ONU.