O Parlamento pide unha "declaración ante a emerxencia climática" en Galicia

O Parlamento de Galicia aprobou este martes por unanimidade, cos votos a favor de PP, BNG e PSdeG, unha iniciativa para, entre outros puntos, solicitar á Xunta unha "declaración ante a emerxencia climática".

A proposta orixinal, rexistrada polos socialistas, reclamaba a declaración "do estado de emerxencia climática", pero o PP introduciu cunha emenda un matiz para "aprobar en Galicia o mesmo que aprobou Pedro Sánchez no Goberno de España" en xaneiro do 2020.

O encargado de defender a proposición non de lei (PNL) foi o deputado do PSdeG Pablo Arangüena, quen urxiu a facer "algo rápido e de maneira contundente" para frear o quecemento global.

Así, defendeu a "declaración do estado de emerxencia climática" en Galicia, unha proposta xa recollida e aprobada na resolución do Debate do Estado da Autonomía do ano 2019, o último da lexislatura pasada. "Non foron capaces vostedes de cumprir", afeou.

Posteriormente, a deputada do PPdeG Marisol Díaz Mouteira recoñeceu que a Xunta non aprobou esta declaración, pero xustificouno en que o Goberno galego "decidiu deixar o papel" e deixar "de falar en abstracto" e "pasar á acción".

Ademais, presentou a emenda dos populares para empregar a denominación de "declaración ante a emerxencia climática" de Galicia porque foi a mesma empregada polo Executivo estatal. "É aprobar en Galicia o mesmo que aprobou Pedro Sánchez", insistiu.

Na réplica, Arangüena (PSdeG) tachou este argumento de "peregrino", pero aceptou o cambio porque o contido "coincide substancialmente, practicamente, milimétricamente" co texto orixinal dos socialistas.

Á parte da declaración "ante" a emerxencia climática, a PNL aprobada tamén inclúe cuestións como alcanzar a "neutralidade climática" como moi tarde en 2050, apostar polo I+D+i para impulsar a descarbonización da economía galega, conseguir unha transición "xusta" e "adaptar" a estratexia contra o cambio climático da Xunta para conseguir unha redución do 55 por cento nas emisións para 2030, tal e como marca a Comisión Europea.

UN "SI CRÍTICO" DO BNG

Pola súa banda, o deputado do BNG Luís Bará garantiu un "si crítico" do seu grupo á iniciativa, porque "nestes debates hai moita retórica buenista e moita contradición" ante o que é "un grave problema".

Neste contexto, chamou a "non desviar a atención" de que son "as grandes corporacións" as "responsables da crise climática", a pesar de que "pretenden facerse pasar por salvadores do planeta". "As causas están nun sistema económico capitalista, depredador das materias primas", resumiu.

Mentres tanto, Bará cualificou á Xunta de ser "unha gran fábrica de cambio climático e de políticas contra natura" ao "reformar todo tipo de leis para permitir que as empresas expolien todo tipo de recursos", mentres que as súas estratexias nesta materia están xa "superadas".