Antonio López disposto a "seguir traballando" como reitor na USC tras a convocatoria de eleccións
Preguntado por se introducirá cambios no seu equipo, avanzou a súa vontade de "facer unha nova proposta" para a universidade na que se inclúen algúns "cambios".
Por E.P. | SANTIAGO DE COMPOSTELA | 17/11/2021 | Actualizada ás 17:08
O actual reitor da Universidade de Santiago de Compostela (USC), Antonio López, ratificou a súa disposición a "seguir traballando" a favor dos proxectos da institución académica tras a convocatoria de eleccións internas.
Así se pronunciou este mércores ao ser preguntado polo adianto das eleccións a reitor convocado pola USC, un proceso interno que culminará o próximo 23 de febreiro.
"Xa dixen desde o inicio do curso que estaba disposto a someter a miña proposta unha vez máis á comunidade universitaria e, se a comunidade universitaria así o entendía, con toda a ilusión, seguir traballando a favor dos proxectos que temos na USC", afirmou.
Nun contexto de pandemia da covid e tras recoñecer que os últimos anos "foron complicados", sostivo que tamén foron "positivos" para a universidade polo que se mostrou "con ganas" de renovar a súa proposta e sometela á comunidade educativa para que esta decida.
Sobre cando oficializará a súa candidatura, sostivo que actualmente aínda se está "en fase de revisión do censo" e lembrou que o prazo de presentación de candidaturas abrirá o próximo mes de decembro.
Ademais, preguntado por se introducirá cambios no seu equipo, avanzou a súa vontade de "facer unha nova proposta" para a universidade na que se inclúen algúns "cambios".
