Comeza a exhumación na fosa do cemiterio de San Pedro de Filgueira, en Crecente

O equipo de memoria democrática da USC iniciou este mércores os traballos de exhumación na fosa do cemiterio de San Pedro de Filgueira, no municipio pontevedrés de Crecente.

O obxectivo é atopar o corpo de César Alberte Domínguez, natural de Arnoia (Ourense), onde traballaba como carpinteiro e ocupou un cargo de concelleiro en 1936, ano do golpe de Estado do bando fascista que deu inicio á Guerra Civil.

A memoria familiar e a pouca documentación que existe sobre o caso de César Alberte Domínguez apunta que foi sacado da súa casa e asasinado na ponte de Castrelo de Miño.

"Non hai rexistro civil de defuncións; con todo, consérvase a denuncia contra os supostos asasinos que interpuxo un tío seu, que é de onde se pode certificar a súa morte", explica o equipo de memoria democrática da USC.