Urxen á Xunta un plan de choque de 2,5 millóns para o sector da castaña, afectado en Ourense por un fungo
A nomoniosis é o principal fungo que afecta os castiñeiros de Ourense e a Xunta, segundo indicou, traballa para atallalo a través de diferentes medidas.
Por Europa Press / Redacción | SANTIAGO DE COMPOSTELA | 10/12/2021 | Actualizada ás 18:21
O conselleiro de Medio Rural, José González, informou de que o ataque da nomoniosis é a principal afección que afecta os castiñeiros da provincia de Ourense entre "varios complexos fúngicos" detectados por mor de problemas observados, como a perda dos seus froitos.
En resposta a unha pregunta do PSdeG no Parlamento, o conselleiro explicou que levan a cabo diferentes iniciativas para minimizar o impacto deste fungo, tales como a eliminación de castiñeiros caídos sobre o chan e ourizos afectados. Ademais, búscanse pés de castiñeiro resistentes á doenza e o uso de bacterias e fungos que poidan actuar como antagonistas á nomoniosis. Así mesmo, entre decembro e xaneiro vanse a pór en marcha 28 novas parcelas de mostraxe entre soutos de maior interese para avaliar a súa situación sanitaria sobre o terreo.
Indica que a nomoniosis foi un fungo detectado por primeira vez en 2020 en Galicia, pero "incrementouse" en 2021. Así, activouse a Rede de Avisos Fitosanitarios cunha alerta sobre sintomatoloxía e descrición do fungo, tras recollerse mostras nos municipios de Viana do Bolo Castrelo de Val, A Mezquita, Vilardevós, A Gudiña e Riós.
Por outra banda, o conselleiro indicou que hai 45 municipios priorizados para levar a cabo traballos de recuperación e mellora en 2.000 hectáreas de soutos de castiñeiros ata 2025, tal como establece o plan forestal.
A deputada socialista Carmen Rodríguez urxiu á Xunta un plan de choque de 2,5 millóns para o sector da castaña, xa que o plan estratéxico do Goberno galego queda "en mera declaración de intencións con nulos resultados".
