Confirmado un cuarto caso da variante ómicron en Galicia
É o primeiro na área sanitaria da Coruña-Cee, que se suma aos tres xa coñecidos na de Vigo.
Por Europa Press / Redacción | Santiago de Compostela | 11/12/2021 | Actualizada ás 18:01
A Consellería de Sanidade confirmou na tarde deste sábado o cuarto caso da variante ómicron do coronavirus SARS-CoV-2 en Galicia. É o primeiro da área sanitaria da Coruña-Cee, que se suma ao tres xa coñecidos na de Vigo.
Os dous primeiros casos desta cepa --un deles, dunha persoa que viaxara a África-- foron anunciados este venres polo presidente da Xunta, Alberto Núñez Feijóo, na rolda de prensa posterior ao Consello. Entón, aseguraba que había outros 10 positivos en covid-19 en estudo porque podían corresponder coa nova variante.
Xa este sábado, o vicepresidente primeiro do Goberno galego, Alfonso Rueda, confirmaba a terceira infección por ómicron --tamén na área sanitaria de Vigo--, á vez que aseguraba que se trata de "casos leves, polo menos os que se coñecen".
O cuarto caso, o primeiro na área da Coruña-Cee, foi notificado na tarde deste sábado pola Consellería de Sanidade e correspóndese cun paciente que está asintomático, tal e como aseguran fontes deste departamento.
Ademais, hai varios positivos por coronavirus que están en estudo, tanto na área coruñesa como na viguesa, porque poderían tratarse desta nova variante.
