Manuel Cabezas defende a súa xestión, todas propostas tiñan informes favorables

O que fora alcalde de Ourense polo Partido Popular entre 1995 e 2007 compareceu este luns na Audiencia Provincial acusado dun delito de prevaricación e malversación por eximir o 10% de aproveitamento urbanístico a construtores e promotores.

En resposta ás preguntas do Ministerio fiscal na primeira sesión do xuízo, o exregidor declarou que "as propostas se asinaban cos informes favorables de técnicos e xurídicos".

No xuízo tamén está acusado o exconcelleiro de urbanismo, Ricardo Campo, ao que tamén se lle atribúen delitos de prevaricación e malversación de fondos públicos no que se coñece como "causa do 10%".

Cando Cabezas foi proclamado alcalde da cidade- con maioría absoluta, 14 de 27 concelleiros, en 1995- estaba en vigor un acordo plenario do 1994 que eximía aos construtores da cesión do 10% do chan, pero dous anos máis tarde, en 1997, aprobouse a Lei do Chan de Galicia e con ela esixíase a aplicación desa cesión que non se atopou en 15 proxectos do Concello de Ourense que se levaron a xuízo.

A denuncia interpúxoa a exconcelleira de urbanismo socialista, Aurea Soto, que exerce a acusación popular desde que se presentou a querela en 2014. Nela acusaba de eximir a promotores e construtores da entrega ao patrimonio municipal do aproveitamento urbanístico do 10% en 15 proxectos de compensación en chan urbano noconsolidado, provocando un prexuízo ao Concello calculado en 1,6 millóns de euros.

Manuel Cabezas foi o primeiro en declarar e, durante o seu defensa, asegurou que "non se aplicou un acordo contra a lei". "Nós só votabamos algo que tivese o beneplácito dos técnicos", sostivo.

Así esgrimiu que tanto antes do 1997 como despois deste ano "emitíronse informes favorables" e que "todos foron votados por órganos colexiados". "Eu sabía que a miña seguridade xurídica estaba nos órganos colexiados onde se votaron as propostas de resolución asinadas por técnicos e xurídicos", asegurou.

Ademais, lembrou que o acordo estaba vixente desde antes de que tomase a alcaldía e asegurou que foi o secretario quen lle falou do mesmo e o secretario era, segundo as súas palabras, "especialista en urbanismo".

Deste xeito, sostivo que, tras ser elixido alcalde, decidiu delegar as competencias non só nos distintos edís senón tamén nos órganos colexiados, as Comisións Informativas como a de urbanismo e que estes órganos "votaron por unanimidade".

Nesta liña, explicou que os expedientes eran "tutelados polo secretario" e que chegaban á Comisión Informativa de urbanismo, "onde estaban todos os grupos políticos", e onde se ditaba a proposta de resolución en base aos informes técnicos e xurídicos.

Pola súa banda, o exconcelleiro de urbanismo, Ricardo Campo apelou ás súas funcións aludindo a que non eran "nin xudicializar nin contradicir ningún expediente técnico ou xurídico" senón "atender a instrución do secretario, para min a persoa máis versada en temas urbanísticos", dixo.

Por iso, tamén explicou que en todos os expedientes puña "proponse aprobar" e iso é o que el facía. "Eu á Comisión propúñalle o que había, xamais levei un expediente con informe desfavorable", asegurou.

TESTEMUÑAS

Pola sala da Audiencia Provincial de Ourense tamén pasaron os dúas primeiras testemuñas, un arquitecto técnico e un arquitecto municipal.

"Eu emitía un informe e advertía o que había, unha ilegalidade, pero o secretario, que é a máxima autoridade xurídica do Concello, discrepaba de min", narrou o técnico municipal, xa retirado, que comezou a traballar no Concello en 1997. Ese mesma testemuña trasladou que entende que a cesión era obrigatoria porque "quedou co 100% en contra da Lei".

A Fiscalía solicita 7 anos de prisión para cada un dos acusados, 17 de inhabilitación e o pago individual de 1,58 millóns de euros por parte de Manuel Cabezas e 1,19 millóns de euros por Ricardo Campo, a defensa sostén a libre absolución.