A conselleira de Vivenda pide por carta á ministra de Transportes que a Sareb non desaloxe a inquilinos
Denuncia que "está a expor a múltiples familias a situacións de desamparo".
Por E.P. | SANTIAGO DE COMPOSTELA | 29/01/2022 | Actualizada ás 15:19
A conselleira de Medio Ambiente, Territorio e Vivenda, Ángeles Vázquez, remitiu unha carta á ministra de Transportes, Mobilidade e Axenda Urbana, Raquel Sánchez, na que reclama que a Sociedade de Xestión de Activos Procedentes da Reestruturación Bancaria non desaloxe a inquilinos en Galicia.
Na misiva, á que tivo acceso Europa Press, explícase que a Sareb "comezou a comunicar a súa vontade de non renovar os alugueres aos inquilinos das súas vivendas con contratos próximos a vencer, esixindo o desaloxo das vivendas ao finalizar os mesmos".
Sinala que estas comunicacións se repetiron en diversas localidades de Galicia, tales como Burela, "chegando mesmo a afectar a vivendas cualificadas como protexidas para aluguer".
Unha situación que "está a expor a múltiples familias a situacións de desamparo". "Ademais, algúns inquilinos puxeron en coñecemento da Xunta de Galicia actitudes impropias dunha sociedade con capital público, como a paralización dos servizos comúns nalgúns dos inmobles referidos", expón a conselleira.
E é que reproba que esta cuestión "choca frontalmente coa política" do Ministerio, dado que a Sareb "desaloxa vivendas alugadas para proceder á súa venda". Por todo iso, Ángeles Vázquez espera que o Goberno central adopte "as medidas oportunas para modificar os criterios de actuación da Sareb en relación coas vivendas alugadas a familias galegas".
AXUDAS PARA COMPRAR VIVENDAS EN CENTROS HISTÓRICOS
Por outra banda, este sábado ábrese o prazo de presentación de solicitudes --ata o 30 de setembro-- para optar a axudas para comprar vivenda nun centro histórico galego. Esta orde está dotada con medio millón de euros.
A axuda con carácter xeral é de 10.800 euros e increméntase ata os 12.800 euros se o solicitante ten menos de 35 anos. Pode chegar ata os 15.000 euros se está nunha das seis Áreas Rexurbe declaradas: A Coruña, Mondoñedo, Ribadavia, Tui, Ribadeo e Ferrol.
