A EMA volve revisar como afecta a vacina da covid-19 á menstruación

O Comité de Avaliación de Riscos en Farmacovixilancia (PRAC, polas súas siglas en inglés) da Axencia Europea do Medicamento (EMA, polas súas siglas en inglés) anunciou que está a volver a avaliar os casos de hemorraxias menstruais abundantes (períodos abundantes) e ausencia de menstruación (amenorrea) tras recibir as vacinas contra a covid-19 de Pfizer e Moderna.

O comité analizara previamente estes problemas de menstruación e concluíu naquel momento que as probas "non apoiaban unha relación causal entre estas vacinas e os trastornos menstruales".

Á vista de novos achados, o PRAC decidiu "avaliar máis a fondo os casos de menstruación abundante ou amenorrea tras a vacinación", solicitando unha avaliación "en profundidade de todos os datos dispoñibles, incluídos os informes dos sistemas de notificación espontánea, os ensaios clínicos e a bibliografía publicada".

"Nesta fase, aínda non está claro se existe unha relación causal entre as vacinas contra a covid-19 e os casos de períodos abundantes ou amenorrea. Tampouco hai probas que suxiran que as vacinas afecten á fertilidade", aclara o organismo regulador europeo.

Os trastornos menstruais son moi comúns e poden ocorrer cunha ampla gama de condicións médicas subxacentes, así como pola tensión e o cansazo. Tamén se notificaron casos destes trastornos tras a infección por covid-19.

As menstruacións abundantes poden definirse como un sangrado caracterizado por un volume que pode interferir na calidade de vida física, social, emocional e material da persoa. A amenorrea é a ausencia de sangrado menstrual durante tres ou máis meses seguidos.