Os negocios de Artesolar, a empresa do irmán de Isabel Díaz Ayuso, en Galicia

O Goberno Local de Touro,  que encabeza o popular Ignacio Codesido, aprobou nun Pleno celebrado hai un ano unha memoria técnica para renovar o alumeado público municipal mediante subvención do Instituto para a Diversificación e o Aforro Enerxético (IDAE). E, para iso, elexiu a marca Artesolar, que é unha empresa na que traballa o irmán de Isabel Díaz Ayuso, a presidenta da Comunidade de Madrid.

A denuncia partiu da Marea Veciñal de Touro que considera este acordo do concello unha "situación a todas luces irregular  e que restrinxe a concorrencia pola que se deben rexer os contratos públicos de acordo coa lexislación vixente". "Hai posibles irregularidades nun contrato de Tomás Díaz Ayuso no concello de Touro no proceso de licitación de máis de 200.000€ en luminarias", indican.

Con todo, Tomás Díaz Ayuso, o irmán da presidenta madrileña, negou absolutamente que el teña nada que ver con ese contrato. "É rotundamente falso o que se denuncia e eu nin coñezo ese concello, nin a ese alcalde", indicou ao tempo que criticou duramente este tipo de acusación porque "causan un dano innecesario".

Ademais, en declaracións ao Galicia Confidencial, Tomás Díaz Ayuso asegura que a empresa na que traballa ten contratos co numerosas institucións públicas, entre elas, Moncloa ou ou Senado. "Non sei quen é Ignacio Codesido nin onde está ese pobo", indicou que criticou a este partido político por vincular a súa actividade profesional coa actividade política da súa irmá, Isabel Díaz Ayuso.

CRÍTICAS DA MAREA LOCAL

Esta marea local, que é o principal grupo opositor no concello, foi moi crítico ca xestión do rexedor Ignacio Codesido neste asunto e pedíu que se retirara o proxecto, votando logo en contra do documento ante a decisión do alcalde de continuar ca renovación do alumeado nesas condicións.  

"O documento foi aprobado cos votos do Partido Popular, consolidando deste xeito uns pregos técnicos que anulan a libre concorrencia esixida por lei nos contratos públicos e que supón na práctica a adxudicación a dedo dun contrato millonario ao irmán da polémica presidenta da Comunidade de Madrid", denuncia nun comunicado.

ARTE SOLAR

O irmán da presidenta da Comunidade de Madrid desenvolve desde maio de 2016 "Responsabilidades de vendas e mercadotecnia" en Artesolar Iluminación S.L. Esta empresa  fabrica produtos LED, segundo o seu perfil de Linkedin. Esta empresa foi beneficiaria de 18 contratos menores, adxudicacións sen concurso nin publicidade, por valor de 113.180 euros (con IVE) coa comunidade de Madrid entre 2017 e 2020. Dez deles desde que Isabel Díaz Ayuso é presidenta.

 

Estas adxudicación, segundo publica El Confidencial,  producíronse mediante contratos menores, un procedemento que recolle a Lei para que as administracións poidan suplirse de subministracións ou servizos de emerxencia que non superen os 15.000 euros (máis IVE). A normativa española permite adxudicar contratos menores sen concurso público, directamente a calquera empresa con capacidade para levar a cabo a necesidade requirida, segundo establece o artigo 131 da Lei de contratos do Sector Público.

 

Os acordos aos que chegou Artesolar Iluminacións S.L. coa Comunidade de Madrid desde 2017 foron asinados pola Consellería de Sanidade (12 contratos, todos co Hospital Ramón e Cajal, menos un para La Paz) e coa Vicepresidencia e Presidencia (cinco contratos, todos para a Canle de Isabel II S.A. e un cun organismo autónomo).