Présas da Xunta para que Pontevedra conceda a licenza para a segunda residencia pública de maiores na cidade
Trátase do proxecto que xestionará a Xunta e que financiará, construirá e equipará a Fundación Amancio Ortega, segundo a conselleira de Política Social, Fabiola García.
Por E.P. | SANTIAGO DE COMPOSTELA | 08/03/2022 | Actualizada ás 16:54
A conselleira de Política Social, Fabiola García, reclamou ao Concello de Pontevedra "que axilice o máximo posible" a licenza para a construción da segunda residencia pública de maiores do municipio de Pontevedra.
Segundo informou, trátase do proxecto que xestionará a Xunta e que financiará, construirá e equipará a Fundación Amancio Ortega. A actuación está á espera da licenza municipal para comezar as obras de construción no barrio da Eiriña cun investimento anunciado de 12 millóns de euros e que contará con 120 prazas de atención públicas e permitirá a creación de 115 postos de traballo.
Foi o pasado mes de novembro cando a entidade solicitou a licenza municipal para executar este proxecto na parcela cedida polo Concello no barrio da Eiriña. "Estamos á espera desde o día 9 de novembro para que se nos conceda a licenza de obra", dixo a conselleira sobre esta residencia, que "é moi necesaria". "Estamos a desexar entrar coa pa", abundou.
Ademais, Fabiola García referiuse a a reforma proxectada na residencia de maiores de Campolongo onde tamén "están á espera de licenza para a reforma integral" do edificio, polo que quixo "trasladar a vontade de colaboración ao Concello de Pontevedra" para "que a axilice o máximo posible".
A Consellería de Política Social contempla un investimento de dous millóns de euros para a reforma integral deste edificio situado na Avenida María Vitoria Moreno e modernizar as súas prestacións ao colectivo da terceira idade.
NOVO MODELO RESIDENCIAL
A conselleira de Política Social, Fabiola García, fixo estas declaracións en Pontevedra no transcurso dunha visita ao centro multiservicios que Saraiva Senior ten no centro histórico e durante a cal sinalou que "Galicia pode presumir dun novo modelo residencial de consenso co sector e á vangarda de España", posto que está "a liderar a gran reforma da atención residencial no país".
Fabiola García lembrou que Galicia é referente en España en Servizo de Axuda no Fogar, con máis de 24.000 usuarios, 16 veces máis que en 2009; ou que impulsou medidas como as casas do maior ou a teleasistencia.
Así mesmo, subliñou que, cando se fala de residencias, Galicia está un paso por diante co novo modelo, que asentou os alicerces da atención residencial: a humanización no trato e reformas estruturais, o aproveitamento do potencial tecnolóxico e as melloras na coordinación sociosanitaria.
