As gasolineiras galegas denuncian que venden a perdas desde hai 10 días e piden unha rebaixa do IVE

Os empresarios de gasolineiras de Galicia denunciaron que venden a perdas desde hai dez días e piden unha intervención inmediata sobre os impostos, cunha rebaixa temporal do IVE. Aseguran que "se os condutores sofren ao ver o litro de gasolina ou gasóleo rozando os 2 euros, os empresarios das estacións de servizo están desesperados porque ven perigar os seus negocios".

Por iso, o presidente da Federación Galega de Estacións de Servizo (Fegaes), Julio López, convocou os empresarios de toda Galicia a unha reunión urxente este xoves en Santiago de Compostela para analizar a situación e, eventualmente, tomar medidas que limiten o impacto nos seus negocios.

Así, a federación sostén que moitos deles vense obrigados a baixar as súas marxes a cero, outros á metade, porque se marcan os prezos coas marxes habituais directamente non venden.

Neste sentido, a presidenta da Asociación de Estacións de Servizo de Ourense, Fara Pérez Bellido, avisa de que están a vender cunha "marxe mínima e con moitos custos". "O diñeiro que xeras coas vendas que compraches o luns non che dá para pagar o seguinte pedido coa tendencia de prezos", asegura.

"Levo a peor semana da miña vida, vendín a perda, por baixo de prezo de custo. O meu prezo de compra hoxe é 1,936 e estou a vender a 1,899 é dicir 40 céntimos por baixo do prezo real", afirma o vicepresidente da Asociación de Estacións de Servizo de Pontevedra, Avelino Couselo.

Ademais, a federación apunta que en Lugo levan 10 días vendendo a perdas, tanto os abandeirados como os libres. Tamén sinala que existen gasolineiras desatendidas que están a vender gasolina 15 céntimos por baixo do prezo de custo.

Deste xeito, o presidente de Fegaes sostén que os empresarios están a soportar unha suba dos prezos de compra dos combustible superior aos 40 céntimos, que non son capaces de trasladar aos clientes. "Estamos a vender sen marxe comercial desde o venres pasado", apunta.

Na mesma liña pronúnciase o presidente da Asociación de Estacións de Servizo de Pontevedra, Benigno Redondo, tamén representante galego na xunta directiva da Confederación de Estacións de Servizo de España, ( CEES), recoñece que as

marxes de beneficios están ao límite porque deberon asumir practicamente toda a subida.

"Existen", sinala Redondo, "unhas diferenzas de tarifas enormes debido á flutuación diaria dos prezos". Ademais, lembra que solicitaron ao Goberno de España unha rebaixa temporal do IVE, pero de momento esta demanda non tivo éxito.