O corpo localizado en Carral é dun veciño de Carballo desaparecido en novembro
Trátase dun home de 40 anos que faltaba do seu domicilio de Carballo desde o pasado 7 de novembro.
Por Europa Press / Redacción | A CORUÑA | 21/03/2022 | Actualizada ás 17:20
O corpo localizado na mañá do domingo nunha zona de difícil acceso do río Barcés, no municipio coruñés de Carral, é o dun veciño de Carballo, que se atopaba desaparecido desde novembro do ano pasado, segundo confirmou SOS Desaparecidos a Europa Press.
Trátase dun home de 40 anos que faltaba do seu domicilio de Carballo desde o pasado 7 de novembro. Tras confirmarse o seu falecemento, a plataforma desactivou a alerta pola súa desaparición.
Segundo informou o 112, foi o 061 o que comunicou ao servizo, ao redor das 11,00 horas, que unha ambulancia se desprazaba ao lugar, posto que un pescador localizara un corpo no río. O 112 puxo os feitos en coñecemento da Garda Civil, que confirmou xa alí que o cadáver se atopaba nunha zona de difícil acceso, polo que solicitaron medios para o seu rescate.
Os bombeiros de Ordes desprazáronse ata o lugar, así como efectivos de Protección Civil da localidade. Ademais, ao tratarse dun lugar limítrofe entre as localidades de Carral e Cerceda, tamén foron informados os Bombeiros de Arteixo.
