Caravana do persoal de residencias privadas na Coruña para protestar polos "irrisorios" salarios

Persoal de residencias privadas protagonizaron unha caravana de coches na Coruña en demanda do convenio e de melloras en materia salarial e laboral. A caravana desenvolveuse sen incidentes e partiu a media mañá do Edificio de Sindicatos para chegar ata a antiga sede de Política Social.

A caravana, na que participaron unha vintena de coches, forma parte do calendario de mobilizacións que as traballadoras e traballadores, uns 10.000 en toda Galicia, están a levar a cabo para visibilizar a folga que, segundo denuncian, non poden exercer por uns servizos mínimos do 100% decretados pola Xunta.

Así o expuxo a Europa Press Lucía Arguiz, delegada da CIG, quen explicou que levan dous anos "sen convenio" e que as propostas planteadar pola patronal en materia económica son "irrisorias". Tamén denuncian que están "ata nove quendas sen librar", o que enmarcan nunhas xornadas "abusivas". Por outra banda, afirman que os cocientes que saen para a cobertura de persoal son "os mesmos que en 1996". Ademais, culpan á Xunta de estar "a mirar para outro lado".

Na comarca da Coruña, para este xoves teñen convocada unha concentración diante da residencia Pai Rubinos e a de Concepción Arenal, en Matogrande. O venres haberá outra ante residencias de Oleiros e Carballo.

POSTURA DA XUNTA

O Consello Galego de Relacións Laborais mediará no conflito aberto no ámbito das residencias privadas de Galicia, no que os traballadores, que reclaman melloras laborais e salariais, permanecen en folga.

Así o confirmou este mércores a conselleira de Política Social, Fabiola García, que compareceu no Parlamento de Galicia para responder a unha pregunta formulada pola deputada socialista Marina Ortega sobre a folga nas residencias privadas e o posicionamento da Xunta.

Sobre esta cuestión, a conselleira asegurou que a Xunta "non pode nin debe inmiscirse" nas negociacións entre unha empresa e os seus traballadores, aínda que estes teñen á súa disposición o asesoramento da Administración galega e a mediación do Consello Galego de Relacións Laborais se así o piden.

Neste caso concreto, os traballadores "solicitaron que o mediador actúe de oficio" e o Consello Galego de Relacións Laborais aceptou a opción, algo "que só ocorre en situacións de gran relevancia pública", apuntou Fabiola García. Por iso, as partes serán convocadas a unha reunión para tratar de chegar a un acordo no marco deste mecanismo de mediación. "Se os deixamos falar, estou segura de que esta situación laboral vai solucionarse", dixo a conselleira.

APOIO AO SECTOR

Durante a súa intervención, a deputada socialista Marina Ortega acusou á Xunta de "non escoitar" aos traballadores e de imporlles unha orde de servizos mínimos que "impiden levar adiante a folga", xa que coinciden cos cocientes de persoal esixidas. "Ou pretende coartar os dereitos dos traballadores ou está a recoñecer que as residencias levan traballando en mínimos todos estes anos", explicou.

Por iso, Ortega considerou "urxente" que a Xunta "apoie ao sector, escoite as súas demandas e medie" neste conflito. "A Xunta ten que tomar unha posición respecto diso", esixiu a deputada socialista, quen lembrou que "todas as residencias de Galicia están baixo a tutela" do Goberno autonómico.

Fronte a isto, Fabiola García lembrou que a negociación colectiva "desenvólvese entre o persoal e os empresarios" e que a Xunta "non pode nin debe inmiscirse", se non que "respectará os acordos aos que cheguen". "Esperamos que, canto antes, poidan chegar a un consenso entre ambas as partes sen que a atención aos maiores se resinta".