Bugallo pídelle a Felipe VI que visite Compostela o 25 de xullo

O alcalde de Santiago, Xosé Sánchez Bugallo, pediu este xoves ao Rei Felipe VI que a Familia Real se desprace a Santiago o próximo 25 de xullo, Día de Galicia, no marco da celebración de Ano Santo Xacobeo 21-22.

Así llo trasladou Sánchez Bugallo ao Rei durante a recepción en Zarzuela dos membros da Asemblea do Grupo de Cidades Patrimonio da Humanidade de España. En rolda de prensa, o rexedor compostelán explicou que o Rei tomou nota da invitación, pero non contestou debido a que a axenda de Casa Real se pecha semanas antes. Bugallo recoñeceu que é "difícil" pero que "oxalá" poida a Familia Real volver visitar Santiago este ano.

VISITA DO PAPA

Pola súa banda, o presidente da Conferencia Episcopal Española, o cardeal Juan José Omella, referiuse a unha posible visita do papa Francisco a Santiago de Compostela con motivo do ano santo: "Eu non son profeta. Cóntolle o meu desexo, o meu desexo é que veña, que veña a Santiago, que veña a Barcelona tamén porque celebramos o ano ignaciano, os de Sevilla quererán que vaia a Sevilla tamén... Pobriño o santo pai!, non sei como poderá facer!".

"Hai unha cousa que me gusta moito do santo pai: é que el se esforza sobre todo por ir alá onde ninguén vai e onde hai moitos problemas, as periferias", afirmou Omella a preguntas dos medios en Santiago con motivo dun encontro de empresarios cristiáns. "Agora que vaia, por exemplo, ao Sudán paréceme impresionante, que vaia ao Congo, onde eu estiven de misioneiro no Congo", valorou Omella en declaracións na hospedaría de San Martiño Pinario, onde se celebrou o evento.

Parécelle "tan bonito" que vaia a eses lugares nos que "sufriron tanto, hai tanta miseria e aínda non está consolidada a paz alí". "Paréceme que isto é precioso". "E iso é o que temos que admirar deste papa e que con el viaxemos todos para achegarnos máis á pobreza das periferias", sentenza.