A CIG denuncia que a Xunta "privatiza" o servizo de podoloxía no canto de crear unha categoría no Sergas
Sinala que máis do 70% das doenzas nos pés poderían ser tratadas por podólogos nos centros de atención primaria.
Por E.P. | SANTIAGO DE COMPOSTELA | 01/04/2022 | Actualizada ás 19:52
A CIG denuncia que a Xunta "privatiza" o servizo de podoloxía coa contratación de autobuses que "percorrerán os municipios galegos tres veces ao ano" no canto de crear esta categoría no Servizo Galego de Saúde (Sergas).
Nun comunicado, reclama que se inclúa de forma "inmediata" esta carteira de servizos con profesionais no ámbito público para ofertar unha asistencia pública "de calidade" e "non un invento promocional de tres día ao ano".
A secretaria nacional de CIG-Saúde, María Xosé Abuín, sinala que, na mesa sectorial do 19 de outubro de 2021, demandouse ao Sergas a posta en marcha deste cadro de persoal, pero "a resposta que deu a administración foi que a asistencia sanitaria tiña dificultade para encaixar esta categoría no Sergas".
Así, o sindicato sinala que máis do 70% das doenzas nos pés poderían ser tratadas por podólogos nos centros de atención primaria. Apunta aos problemas que carrexa o chamado pé diabético, pois a súa atención reduce a taxa de amputacións, mortalidade e prevalencia de úlceras.
Ademais, remarca que máis do 80% das persoas da terceira idade necesitan periodicamente de coidados podológicos, mentres a atención podológica supón ao redor do 5% das consultas atendidas en pediatría en atención primaria.
