Nova edición dos Premios María Casares con 30 espectáculos e máis de 300 profesionais
Entregaranse o 2 de xuño na Coruña, no Teatro Rosalía de Castro.
Por E.P. | SANTIAGO DE COMPOSTELA | 05/04/2022 | Actualizada ás 12:21
Un total de 30 espectáculos e máis de 320 profesionais concorren aos XXVI Premios de Teatro María Casares, uns galardóns que se entregarán o 2 de xuño na Coruña, no Teatro Rosalía de Castro.
Nun comunicado, a Asociación de Actores e Actrices de Galicia (AAAG), que organiza estes premios, informa de que a primeira rolda de votacións xa está aberta --ata o 18 de abril ás 15,00 horas-- a un censo de votantes conformado por máis de 450 profesionais do sector escénico.
A finais de abril daranse a coñecer os finalistas en cada unha das 14 categorías existentes. Na gala do 2 de xuño tamén se entregará o Premio de Honra Marisa Soto --que se concede a unha persoa ou entidade-- e lerase o Manifesto Galego no Día Mundial do Teatro, redactado este ano por Fernando Dacosta.
Entre a trintena de espectáculos inscritos atópanse obras do Centro Dramático Galego, Voadora ('Othello'), Sarabela Teatro ('Morgana en Esmelle') e Contraproducións/Teatro Romea ('Cigarreiras').
