A Xunta facilita financiamento ás gasolineiras para asumir os anticipos

O Goberno galego aprobou este venres as bases reguladoras do programa que lles permite ás pemes galegas e autónomos acceder a novas liñas de financiamento e que presta unha especial atención á axuda que se lles poida ofrecer ás empresas que se están vendo máis afectadas polo contexto económico actual.

Segundo explicou o presidente galego, Alberto Núñez Feijóo, esta medida enmárcase dentro do 'plan de choque' impulsado pola Administración autonómica e inclúese o criterio específico para facilitar o acceso das estacións de servizo a estas axudas.

O paso dáse, remarcou, tras confirmar co sector as dificultades que están a sufrir ao non cobrar polo momento os anticipos comprometidos polo Goberno central e ao ter que facer fronte aos adiantos necesarios para cumprir coa rebaixa de 20 céntimos no litro de combustible aos seus clientes.

En concreto, a través dun convenio entre o Igape --dependente da Vicepresidencia Segunda e Consellería de Economía, Empresa e Innovación--, as sociedades de garantía mutua (SGR) e entidades financeiras, avalaranse operacións por un máximo de 80 millóns de euros.

Así, prevese que ata 60 millóns de euros se destinen a esta nova liña de reaval que pretende dar resposta ás dificultades económicas que están a atravesar as pemes máis afectadas neste contexto económico actual, entre as que se atopan as gasolineiras.

O obxectivo é que poidan financiar os pagos operativos e investimentos para reducir a súa exposición ás materias primas e aos combustibles máis encarecidos, ademais de permitir ás pemes en xeral acollerse a esta liña de financiamento para realizar melloras na eficiencia enerxética.