Por E.P. | SANTIAGO DE COMPOSTELA | 27/04/2022 | Actualizada ás 13:01
A partir do próximo domingo, día 1 de maio, poderanse solicitar de forma electrónica os predios do Banco de Terras de Galicia no marco do primeiro período de arrendamento adaptado á Lei galega de recuperación da terra agraria.
O Diario Oficial de Galicia (DOG) publica este mércores a orde da Consellería do Medio Rural pola que se regula a prestación electrónica destas solicitudes, unha novidade que, conforme indicou a Xunta, busca mellorar a eficiencia e axilidade do procedemento á vez que se adapta ás modificacións introducidas pola citada normativa.
Nun comunicado, o departamento que dirixe José González explicou que a orde regula o formulario e o modo de presentación de acordo coas regras de arrendamento de predios (número de solicitudes, criterios de concorrencia e puntuacións, duración dos arrendamentos, etc.) aprobadas por acordo do Cosnello de Dirección da Axencia Galega de Desenvolvemento Rural o pasado 20 de abril.
Así, establecéronse dous períodos anuais para a presentación de solicitudes de arrendamento. O primeiro comezará o día 1 de maio de cada ano e o segundo, o un de novembro, ambos cunha duración de 15 días hábiles. Deste xeito, o próximo 1 de maio abrirase o primeiro período de arrendamento de parcelas do Banco de Terras adaptado á Lei de recuperación.
En virtude da orde publicada este mércores, as solicitudes presentaranse preferiblemente por vía telemática través da sede electrónica da Xunta ou desde a páxina web do Banco de Terras de Galicia.
A presentación electrónica será obrigatoria para as administracións públicas, as persoas xurídicas, as entidades sen personalidade xurídica, os traballadores autónomos e os representantes dalgún dos anteriores. O resto de interesados poderán optar pola vía electrónica habilitada ou ben presentar as solicitudes acudindo en persoa a calquera dos lugares e rexistros establecidos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.