Santiago aproba pagará as horas extra de 2020 a Policía Local e Bombeiros tras levantar o reparo
Os socialistas din que o atraso debeuse a un "problema informático" e Bugallo pediu desculpas porque "se debería facer antes".
Por Europa Press / Redacción | SANTIAGO DE COMPOSTELA | 28/04/2022 | Actualizada ás 11:59
O Concello de Santiago acordou este xoves en pleno levantar o reparo para o pago das horas extra á Policía Local e Bombeiros correspondentes ao ano 2020. Na votación, por puntos, os grupos optaron pola abstención técnica "para facilitar a aprobación" do punto do levantamento, mentres que os socialistas deron o seu voto afirmativo en todas as votacións e Compostela Aberta fíxoo nos dous puntos restantes.
A oposición mostrouse moi crítica co atraso de dous anos no pago das horas extra, unha tardanza que cualificaron de "escandalosa" e que, apuntan, manifesta un total "desgoberno". A nacionalista Goretti Sanmartín xustificou a abstención do seu grupo sinalando que "unha cousa é facilitar e outra facelo ben". "Xa defendemos en varias ocasións que se contraten auxiliares de policía local para eventos especiais, xa que se debería incrementar o cadro nun 20%", explicou.
Compostela Aberta, pola súa banda, na voz de María Rozas, asegurou que "non hai precedentes no concello" deste atraso, que é "escandaloso en calquera caso, pero máis se cabe nunha administración pública". "Non estamos ante un problema de falta de fondos, senón de falta de xestión e de descontrol", sinalou.
Rozas afeou a "despreocupación e o pasotismo" do Concello, "chegando mesmo a ter a un bombeiro en folga de fame no Obradoiro". "O expediente podía traerse xa en 2020", asegurou, tras o que se preguntou que ocorrerá coas horas extra de 2021 e 2022.
O popular Ramón de Jesús Quiroga Limia cifrou a débeda total en máis dun millón de euros e queixouse de que tanto policías locais como bombeiros "fagan continuos esforzos, quitándolle horas á familia e a conciliación, e aínda encima non se lles pague".
PROBLEMAS COA ADMINISTRACIÓN ELECTRÓNICA
A socialista Marta Abal explicou que o atraso no pago das horas extras de 2020 debeuse a un problema informático derivado da instalación do novo software de pago de nóminas. Respecto das prazas, lembrou que se moven coa taxa de reposición aprobada por lei. "Se existise a mínima posibilidade de crear máis prazas, faríase", comentou.
A este respecto, María Rozas indicou que "as escusas son cada vez máis inverosímiles". "Fáltalles dicir que os expedientes comeullos o can. Agora o problema de que se tarden dous anos en pagar as horas extra é da administración electrónica", ironizou.
Na mesma liña expresouse Quiroga, que cualifica de "pouco crible" a explicación do problema informático e, na súa opinión, "fala do pouco propósito de emenda do Goberno local".
O último en ter a palabra foi o propio alcalde, Sánchez Bugallo, que respecto da taxa de reposición explicou que por cada dez xubilacións, cóbrese tan só unha praza, o que se viu agravado ademais polo adianto na idade de xubilación dos policías. Así, indicou, explícase que en 2011 houbese 172 e en 2021 haxa 127.
"O tema dos bombeiros é estrutural. Mantense o mesmo compromiso de Compostela Aberta, que haxa nove de servizo", explicou, tras o que pediu desculpas polo atraso no pago das horas extras, "que se debería facer antes".
