O PSdeG recoméndalle "algunhas lecturas" a Rueda tras as súas palabras sobre o Rei Emérito

O secretario de Organización do PSdeG, José Manuel Lage, respondeu ás palabras nas que o presidente da Xunta, Alfonso Rueda, destacou o impacto "positivo" da visita do rei emérito por pór "no mapa" á Comunidade galega. "A Galicia no mapa non a puxeron os Borbóns, está posta de antes da dinastía dos Borbóns e seguirá despois de que existan os Borbóns en España", sostivo.

En declaracións aos medios este mércores, o dirixente socialista asegurou que lle "gustaría" que o presidente da Xunta "non avergoñase" aos galegos "cun descoñecemento tan importante da historia". José Manuel Lage destacou que Galicia "xa está posta no mapa desde fai centos de anos" e recomendoulle a Alfonso Rueda "algunhas lecturas" como as 'Cantigas de Santa María' de Alfonso X O Sabio. "Despois, se falamos do mapa, lembrar que no mapa nos puxo Domingo Fontán", dixo.

Así as cousas, tras soster que o que se pode producir en Sanxenxo será "unha situación de orde privada que ten transcendencia pública", considerou que "a moitos españois" non lles enche "nin de orgullo nin de satisfacción" este asunto. "Máis ben xéranos unha sensación amarga, entre outras cousas porque quen ostentou a xefatura do Estado, coa súa práctica, non cumpriu coa exemplaridade que se lle espera", afirmou.

Deste xeito, incidiu en que "non houbo exemplaridade" e que "a boa parte da poboación non lle parece que haxa que andar facendo ostentación de nada". "E creo que o que é un pouco preocupante é que o presidente da Xunta, nas súas primeiras horas como presidente, a súa maior achega sexa a de dicir que este señor vai pór a Galicia no mapa", apuntou.

A secretaria local do PSOE de Ourense, Natalia González; o secretario de Organización do PSdeG, José Manuel Lage; e o secretario provincial do PSOE Ourensán, Rafael Rodríguez Villarino, en Santiago. PSDEG | Fonte: Europa Press

INÉS REY

Na mesma xornada, a alcaldesa da Coruña, Inés Rey, apelou a pór a Galicia no "mapa do progreso" con políticas en materia industrial e económica e non pola visita a esta comunidade autónoma do rei emérito Juan Carlos.

Así se manifestou ao ser preguntada polas declaracións do presidente da Xunta, Alfonso Rueda, en relación á visita a Sanxenxo do rei emérito, tras case dous anos de 'exilio' en Abu Dabi. Nelas, Rueda dixo que sería pór a Galicia "no mapa".

Sobre estas declaracións, e preguntada por elas tras a firma dun convenio de colaboración coa Xunta, manifestou que quere que Galicia estea "no mapa" das políticas industriais de emprego activas, que permitan que os mozos non teñan que emigrar. A iso, sumou políticas en materia de vivenda. "Que se poida desenvolver unha vida plena en Galicia", recalcou Inés Rey, quen apelou a traballar "todos xuntos para pór a Galicia no mapa do progreso e da recuperacin social e económica".