Convocada a quinta edición dos premios PEL ás mellores empresas da Coruña
Están organizados pola Deputación provincial.
Por E.P. | A CORUÑA | 25/05/2022 | Actualizada ás 19:37
O Boletín Oficial da Provincia (BOP) publica este mércores a convocatoria da V edición dos Premios PEL da Deputación da Coruña.
Segundo informa o organismo provincial, o obxectivo destes galardóns é "recoñecer o esforzo e implicación das empresas, persoas profesionais autónomas, das asociacións e clústers empresariais da provincia no desenvolvemento económico, na creación de emprego e riqueza no territorio".
"Ao éxito na recepción de candidaturas nas pasadas edicións, máis de 300 en total, súmase a gran confluencia de asistentes aos actos de entrega de galardóns, situándoo como un dos premios con maior participación e acollida na escena provincial", remarca a institución coruñesa.
Nesta nova edición, a Deputación destinará un total de 75.000 euros a premiar a excelencia das empresas e asociacións empresariais da provincia. A principal novidade desta edición é a redución de categorías, que pasan das cinco que viñan sendo habituais a tres coa finalidade de incrementar o montante dos primeiros premios nas categorías con maior concorrencia.
