Galicia rexistra un superávit de 215 millóns de euros no primeiro trimestre, o 0,31% do PIB

Galicia rexistrou un superávit de 215 millóns de euros no primeiro trimestre do ano, o que equivale ao 0,31% do Produto Interior Bruto (PIB), segundo os datos facilitados polo Ministerio de Facenda. No mesmo período de 2021, Galicia presentaba un déficit de 79 millóns de euros, o 0,12% do PIB. A maioría das comunidades autónomas pecharon o primeiro trimestre con superávit, fóra da Comunidade Valenciana, Cataluña, Baleares e Murcia.

No ámbito estatal, o déficit no conxunto das administracións públicas, excluída a axuda financeira, situouse en 4.412 millóns de euros ata marzo, o que supón restar 16.048 millóns á cifra rexistrada un ano antes, un 78,4% menos, polo que descende ao 0,34% do PIB.

No que respecta ao déficit do Estado ata o mes de abril, o dato sitúase no 0,5% do PIB, fronte ao 1,68% existente no mesmo período de 2021. Desta forma, o déficit sitúase en 6.553 millóns, o que supón un descenso do 67,6% respecto dos 20.249 millóns do mesmo período do exercicio anterior.

Este resultado débese, segundo Facenda, a un "sólido" incremento dos ingresos non financeiros do 16,7%, fronte ao comportamento dos gastos, que decrecen a un ritmo do 4%.

"A evolución ata abril mostra que o déficit do Estado continúa a senda descendente iniciada en 2021 como consecuencia da reactivación económica e a creación de emprego impulsadas polo avance do proceso de vacinación", destacou o Ministerio que encabeza María Jesús Montero.

En canto ao déficit público ata marzo, o da Administración Central aglutinou a maior parte, con 3.525 millóns, o 0,27% do PIB, e dentro deste, o déficit do Estado reduciuse á cifra de 5.143 millóns, o que equivale ao 0,39% en termos de PIB. Pola súa banda, os Organismos da Administración Central rexistran ata marzo de 2022 un superávit de 1.618 millóns, fronte ao déficit de 259 millóns dun ano antes.

Do seu lado, a administración autonómica rexistrou un superávit no primeiro trimestre de 220 millóns, o que equivale ao 0,02% do PIB, fronte ao déficit de 3.416 millóns dun ano antes. Este resultado obedece a un lixeiro aumento dos gastos do 2,5%, fronte aos ingresos que crecen a un maior ritmo, do 11%.

En canto aos Fondos de Seguridade Social, os datos apuntan a que se rexistrou ata o terceiro mes de 2022 un déficit de 1.107 millóns e situouse no 0,08% do PIB, o que representa un descenso do 847,8% respecto de marzo de 2021. Este comportamento é consecuencia dunha leve diminución dos ingresos do 0,1% --destaca o bo comportamento das cotizacións cun crecemento da 4,7%-- fronte ao descenso rexistrado nos gastos dun 2,2%.