Pontevedra agarda ter o seu primeiro parque infantil acuático a finais de ano
Está pensado par diferentes idades e contará con diferentes tipos de xogos de auga.
Por Galicia Confidencial | Pontevedra | 30/05/2022 | Actualizada ás 19:10
O Concello de Pontevedra deu luz verde este luns ao expediente de contratación do proxecto que permitirá dotar á cidade do seu primeiro parque infantil con xogos de auga na ribeira do río Lérez, no parque Rosalía de Castro.
Tal e como explicou o impulsor do proxecto, o concelleiro de Desenvolvemento Sostible e Medio Natural, Iván Puentes, o orzamento desta contratación ascende a 375.015,06 euros e o prazo de execución das obras é de catro meses. "Agardamos que este parque de xogos acuáticos poida facerse realidade mesmo antes de que remate o ano”, dixo. O edil socialista lembrou que estes terreos están clasificados como solo urbano e zona verde conforme ao PXOU vixente e non están afectados por Costas, polo que “os traballos poderán poñerse en marcha unha vez que se valoren as ofertas e se adxudiquen as obras”.
O parque acuático contará con elementos pensados para diferentes idades, accesibles e seguros e diversas áreas: unha zona con xogos de texturas de auga suave, outra zona interactiva con chorros e unha terceira con efectos visuais e maior caudal de auga. Asemade, crearase unha zona deportiva e de fitness ao aire libre e o axardinamento de todo o contorno e instalaranse modernos sistemas de iluminación e rega e mobiliario urbano.
Iván Puentes destacou que todos os xogos estarán fabricados segundo a Norma Europea EN1176, con aceiro inoxidable, e dotados dun sistema de protección de pés para evitar que esta parte do corpo poida danarse ao xogar. O parque contará con iluminación LED na mesma área de xogo, con luces embebidas á beira dos chorros de chan, xerando efectos visuais e de espectros de cor.
Por outra banda, a zona deportiva e de fitness formularase como un gran espazo ao aire libre para que a xente adestre no contorno do parque Rosalía de Castro, con equipos inclusivos, un circuíto de cross training con elementos de resistencia axustables (con cadeira de barras, área de pesas magnéticas, aneis…) e outra de cardio con varios modelos de bicicletas fitness: de spinning estáticas, elípticas e de mans, todas elas con diferentes modos de resistencia.
