O Concello da Capela acolle o primeiro centro de Galicia para xestionar fondos Next Generation
Segundo o presidente da Deputación, Valentín González Formoso, estas instalacións, emprazadas no núcleo das Neves, supoñen "unha aposta clara da Deputación polo rural" e "unha demostración de que é posible activar proxectos pioneiros como este, que axudan a dinamizar unha provincia desde un pequeno municipio".
Por E.P. | SANTIAGO DE COMPOSTELA | 03/06/2022 | Actualizada ás 19:45
O presidente da Deputación da Coruña, Valentín González Formoso, inaugurou o novo centro 'Next Deputación', o primeiro centro de Galicia creado especificamente para dar apoio aos municipios na captación e xestión de proxectos susceptibles de ser financiados con fondos Next Generation da Unión Europea (UE).
Na posta de longo deste centro, instalado no municipio da Capela, pertencente á comarca do Eume, déronse cita, ademais de González Formoso, varios alcaldes da zona e rexedores da Coruña e Santaiago, Inés Rey e Xosé Sánchez Bugallo, que foron recibidos todos eles polo alcalde deste municipio, Manuel Meizoso (PSOE).
Segundo González Formoso, estas instalacións, emprazadas no núcleo das Neves, supoñen "unha aposta clara da Deputación polo rural" e "unha demostración de que é posible activar proxectos pioneiros como este, que axudan a dinamizar unha provincia desde un pequeno municipio".
DE TODA A PROVINCIA
O tamén secretario xeral do PSdG detallou que "estou seguro de que nesta oficina máis dunha vez veremos a alcaldes e alcaldesas de toda a provincia vindo xestionar proxectos que van mudar a vida da xente da súa localidade", e que "creamos esta oficina fose do ámbito urbano para darlle unha oportunidade ao mundo rural, que tamén pode ofrecer servizos centrais para o resto, porque os pequenos teñen dereito a vivir, porque non todo ten que ser nunha capital e porque a descentralización feita con criterio e con sentido é unha fórmula de evitar que Galicia se desangre desde o punto de vista demográfico".
SERVIZOS
A nova oficina Next Deputación dará asesoramento aos 93 concellos da provincia co obxectivo de situalos como potenciais beneficiarios dos fondos europeos, "miles de millóns de euros que a Unión Europea asigna a España e que queremos que se concreten e aterren nos territorios", asegurou Formoso. "O noso obxectivo é situar á provincia da Coruña á vangarda de España neste ámbito e que ningún concello perda esta oportunidade histórica por falta de medios técnicos", agregou.
Pola súa banda, o alcalde da Capela, Manuel Meizoso, agradeceu "á Deputación o seu esforzo por crear esta oficina e situala aquí, o que é unha clara aposta do presidente polo mundo rural". O investimento realizado pola Deputación da Coruña foi de case 600.000 euros para a posta en marcha da oficina durante dous anos.
