Asociación Eólica de Galicia: "Non entendemos o ruído social que se xerou"

A Asociación Eólica de Galicia (EGA) calcula que se perderon "máis de 1.500 postos de traballo nos dous últimos anos" debido á "freada que sofre o sector". Con motivo do Día do Medio Ambiente que se celebra este domingo, a entidade adiantou este dato que extrae do estudo de impacto do sector en Galicia que, avanza, péchase nestes días e, proximamente, será presentado á sociedade.

A asociación argumentou que esta "freada" é "unha consecuencia lóxica do bienio pandémico", así como de "a moratoria decretada pola Xunta ata o verán de 2023".

Neste sentido, criticou que esta suspensión obriga a deter a actividade cando, ao seu xuízo, "Galicia e España máis necesitan avanzar no desenvolvemento de enerxías renovables". "Imos camiño de tres anos nos que apenas se construíu nada", lamentou.

Ademais, expresou que o sector "non entende o ruído social que se xerou demonizando a enerxía eólica" e defende que se trata dunha "fonte limpa e autóctona que evita cinco millóns de toneladas de CO2 cada ano".

Por iso, reivindica que celebra "con orgullo" o Día do Medio Ambiente porque o sector xera "enerxía verde" e contribúe "ao desenvolvemento de economías rurais" ao implantar os parques eólicos en "áreas de baixa densidade de poboación e compatibles con usos agropecuarios e forestais".

Ademais, insistiu en que non teñen ningún conflito "no cento de municipios" onde se instalaron, "agás algunha excepción" e asegurou que os propietarios das terras "non queren" que abandonen o lugar debido aos "beneficios" que, sinala, obteñen coa súa presenza.