Un total de catro persoas morreron afogadas en Galicia no mes de maio

Un total de catro persoas morreron afogadas en espazos acuáticos en Galicia en maio, mentres que no Estado se rexistraron 30 casos no pasado mes e 83 afogamentos no que vai de ano, segundo o informe da Real Federación Española de Salvamento.

Deste xeito, o pasado mes de maio converteuse no máis luctuoso desde 2016 ao perder a vida en espazos acuáticos do Estado por afogamento non intencional 30 persoas, o que supón máis do dobre que morreron por esta causa no mesmo mes do ano pasado, que foron 14.

Para o director de Prevención e Seguridade e portavoz da Real Federación Española de Salvamento e Socorrismo, Francisco Cano, a cifra do mes pasado "debería levar a facer unha profunda reflexión" sobre se o problema dos afogamentos nos espazos acuáticos "vai ser, de novo, o gran esquecido das institucións públicas dentro das causas evitables de morte".

Ao seu xuízo, "a forma na que a sociedade afrontou a saída das medidas restritivas que se adoptaron como consecuencia da pandemia pode estar detrás desta cifra".

Río Miño ao seu paso por Arbo | Fonte: arquivo