Constituído o Comité de Coordinación Policial Antiincendios 2022 entre Xunta e Goberno central

O director xeral de Defensa do Monte, Manuel Rodríguez, presidiu este martes a constitución do Comité de Coordinación Policial Antiincendios 2022 entre a Xunta e o Goberno central, que estará operativo desde o 1 de xullo ata o próximo 30 de setembro, período establecido como época de alto risco de incendios forestais.

Segundo informou a Consellería do Medio Rural, este comité ten como finalidade coordinar as actuacións da Xunta e do Goberno central en materia de investigación, vixilancia e disuasión para facer fronte aos incendios forestais en Galicia, co obxectivo de "sumar sinerxías e minimizar os danos ocasionados polos lumes no patrimonio forestal".

Nesta reunión, o director xeral expuxo que se mobilizan máis de 7.000 efectivos en época de alto risco, entre os propios da Xunta e os do Estado, ao amparo do Plan de prevención e defensa contra os incendios forestais de Galicia (Pladiga) 2022. Así mesmo, informou de que nesta campaña os medios humanos estarán apoiados por 380 motobombas e unha trintena de medios aéreos.

Ademais, Manuel Rodríguez destacou que o novo Pladiga reforza a Rede de vixilancia no monte ao incorporar seis novas cámaras en tres novas localizacións, polo que se alcanza a cifra de 148 unidades en 74 puntos. Neste sentido, detallou que as cámaras contan cunha tecnoloxía "de última xeración" especialmente deseñada para exteriores e vixilancia forestal.