Abanca recomenda contar con estudos de proxectos para anticiparse a Next Generation
Apunta ao "impacto brutal" que terán preto de 140.000 millóns dos Next Generation para os próximos anos. A modo de exemplo, referiuse a próximas convocatorias que se prevén para o terceiro e cuarto trimestre deste ano relativas a dixitalización e eficiencia enerxética, con 150 millóns na liña de biogás.
Por E.P. | Santiago de Compostela | 16/06/2022 | Actualizada ás 20:12
Abanca celebrou en Santiago de Compostela unha xornada divulgativa sobre o Proxecto Estratéxico para a Recuperación e Transformación Económica (PERTE) do sector agroalimentario, na que se abordou as oportunidades que supoñen os 1.800 millóns que se reservan para cuestións como modernización e dixitalización de empresas do agro e o mar.
Nesta cita, César Cantalapiedra López, socio director de finanzas públicas de Analistas Financeiros Internacionais (AFI), explicou que os prazos son "moi esixentes" para optar a estes fondos europeos de recuperación, o que "obriga a ter os proxectos preparados, ter un preestudio para no momento que saian ter capacidade de resposta".
De feito, cre que eses prazos "deberían relaxarse", xa que a "administración está moi preocupada" pola execución e cumprir con obxectivos, pero isto carrexa un tempo "moi curtos". "Recoméndolles que non esperen a que se publiquen as axudas, se ten vostedes proxectos de investimento planificados, que vaian falándoo cos especialistas de Abanca" e preparando as memorias para "ter capacidade de reacción".
Así mesmo, Cantalapiedra apunta ao "impacto brutal" que terán preto de 140.000 millóns dos Next Generation para os próximos anos. A modo de exemplo, referiuse a próximas convocatorias que se prevén para o terceiro e cuarto trimestre deste ano relativas a dixitalización e eficiencia enerxética, con 150 millóns na liña de biogás.
"ALDRABADA" PARA O SECTOR
A xornada, moderada pola directora de Next Generation Abanca, Mónica Gondar Álvarez, tamén contou coa intervención de Andrés Montero Aparicio, da Unidade de Seguimento do PRTR no gabinete de Presidencia do Goberno, que incidiu en que se trata dunha "cantidade de fondos nunca vista na historia deste país". Remarca que a orde de bases relativa ao Perte agroalimentario publicarase proximamente e suporá "unha aldrabada" para o sector.
Respecto destes fondos europeos, puxo o exemplo de que xa se concederon uns 28 proxectos en Galicia para o desenvolvemento tecnolóxico no sector pesqueiros de confrarías e para a dixitalización da frota, con máis dun millón de euros.
Así, debullou o tres eixos do Perte agrolimentario: medidas de apoio específico a industria agroalimentaria, dixitalización e I+D+i. Igualmente, remarca as "sinerxías" que poden existir con outros Pertes, tales como o do ciclo da auga ou enerxías renovables.
ABANCA MAR E AGRO
"Pola súa capacidade de arrastre en distintos ámbitos, espérase que o Perte agroalimentario favoreza a creación de novos modelos de negocio, oportunidades laborais e aforro no tecido produtivo, as economías domésticas e os orzamentos públicos", destaca Mónica Gondar.
Tamén repasou os elementos fundamentais do modelo que o banco emprega para atender as necesidades das empresas do complexo agroalimentario a través das unidades especializadas Abanca Agro e Abanca Mar.
Entre as actuacións máis destacadas de Abanca Mar, enumerou a renovación da frota pesqueira, o investimento para a modernización das explotacións de acuicultura e o financiamento de investimentos en industria transformadora, aparellada a subvencións do Fondo Europeo Marítimo, de Pesca e de Acuicultura (FEMPA).
No caso de Abanca Agro, como principais actuacións citou o financiamento de investimentos da industria agroalimentaria, os plans de mellora, os investimentos no sector forestal e os anticipos PAC, entre outros.
Ademais, remarca que "os equipos de Abanca Agro, Abanca Mar e Next Generation Abanca están a analizar as oportunidades existentes para o sector co obxectivo de anticipar axudas e deseñar produtos de financiamento específicos que complementen os recursos dos proxectos".
A organización desta xornada forma parte da batería de accións que Abanca pon en marcha para facilitar o acceso dos seus clientes ás axudas do programa para a recuperación e transformación da economía.
