Feijóo volve a Galicia de romaría
Uns 4.000 afiliados e simpatizantes do PP participan este sábado na Romaría do Pino, co regreso do expresidente da Xunta como atractivo.
Por Europa Press / Redacción | Santiago de Compostela | 01/07/2022 | Actualizada ás 19:54
Afiliados, militantes e simpatizantes do PP daranse cita na xa tradicional romaría que a formación conservadora celebrará este sábado, a partir do mediodía, na localidade coruñesa do Pino. Organizado polo PP provincial, o acto contará coa intervención do líder do PP, Alberto Núñez Feijóo; o presidente do PPdeG, Alfonso Rueda; e o xefe de filas dos populares na provincia, Diego Calvo.
Tras dous anos sen poder celebrar esta cita debido á pandemia, a dirección provincial volveu convocar a 'familia' popular a unha xornada de marcado carácter lúdico.
"Deixaremos atrás, sen esquecernos dos que xa non están connosco, meses duros nos que estivemos privados dos bicos, dos abrazos e das alegrías que gozamos estando xuntos", trasladou Diego Calvo.
Para o presidente provincial, a recuperación desta romaría sempre foi un dos seus principais obxectivos estes anos. Non en balde, lembra o PP, a cita sempre "foi un éxito de organización e de afluencia de persoas en todas as súas edicións".
"En canto podamos facela, que ninguén dubide que a volveremos facer", trasladara o popular en todas as citas con militantes e afiliados.
Desta maneira, as 4.000 persoas que confirmaron a súa asistencia demostran, unha vez máis, apuntou o presidente popular coruñés, "a unión e a forza" que os populares teñen "en todos os recunchos da provincia da Coruña".
A organización colocará unha carpa de máis de 3.800 metros cadrados para dispensar unha comida na que non faltará a empanada, polbo e a tradicional 'carne ao caldeiro'. O prezo será de 25 euros por asistente, o que resulta en 100.000 euros.
A once meses da cita coas urnas municipais, a Romaría servirá tamén de pistoletazo de saída da campaña para as eleccións locais, na que os populares confían en poder aproveitar "o bo momento" que vive o PP estatal para "recuperar o goberno da Deputación da Coruña e concellos importantes como A Coruña, Santiago e Ferrol".
"Temos que chegar fortes a elas, temos que demostrar unha vez máis que somos a ferramenta para mellorar a vida da xente. Os que imos solucionar os seus problemas e, nunca, os que os causamos", concluíu Calvo.
