Unha trintena de asociacións selan un manifesto en contra do veto á pesca de fondo en 94 zonas

Unha trintena de asociacións pesqueiras de Galicia selaron un manifesto en defensa do sector para mostrar o seu rexeitamento á intención de Bruxelas de vetar a pesca de fondo en 94 zonas de augas comunitarias.

A sala de Pesca do Museo do Pobo Galego foi o lugar elixido para escenificar a unión do sector ao redor do 'Manifesto en defensa da pesca, o marisqueo, a acuicultura e a cadea mar-industria europeas', nun acto no que a conselleira do Mar, Rosa Quintana, reclamou á Comisión Europa que "ouza a voz do sector pesqueiro" e "defenda os intereses de toda a pesca europea en contra daqueles que queren acabar con esta actividade".

Así, demandou á CE que "recapacite" ante a posibilidade dun veto á pesca de fondo en case un centenar de áreas, posto que "pon en gran risco a todo o sector pesqueiro da Unión Europea", o que "para Galicia suporía un fracaso total", especialmente na frota do Gran Sol e litoral.

Nesta liña, a conselleira censura que "foi unha proposta feita rápido", "sen achegar os suficientes argumentos científicos, técnicos e estudos socioeconómicos". Require "os estudos pertinentes", xa que Galicia os pediu pero non se mandaron. "Por tanto, supomos que non os teñen (os estudos)", reproba.

Por todo iso, Quintana ofrece a "man tendida" á CE para traballar, dado que "non hai ningunha arte de pesca mala, senón que pode estar ben ou mal utilizado". Agora, Galicia convidará o resto de comunidades pesqueiras do Estado e a outras rexións europeas a adherirse a este manifesto en defensa da pesca.

MANIFESTO

A xerente da cooperativa de armadores de Ribeira, María José Casais, foi a encargada de ler este manifesto nun acto simbólico con representantes das asociacións asinantes, entre as que se atopan a Cooperativa de Armadores de Vigo (ARVI), Pescagalicia ou Acerga.

O texto censura que a política ambiental "vai aos poucos impoñéndose" á pesqueira, de forma que considera a proposta de Bruxelas do veto á pesca de fondo en case un centenar de áreas como un "exemplo do que non se debe facer". E é que advirte de que a conservación do ambiente mariño "non se pode facer en detrimento" do sector pesqueiro. De feito, incide en que a proteína de orixe mariña ten "unha pegada de carbono máis reducida que a maioría dos sistemas de produción de alimentos".

De tal modo, avógase por unha "cohabitación pacífica" entre as políticas pesqueiras e ambientais, pois se incide na importancia socioeconómica en zonas periféricas como Galicia. "Vemos con crecente preocupación como a actividade pesqueira está a ser progresivamente acantonada en beneficio doutros obxectivos como o desenvolvemento enerxético, en particular os relacionados coa conservación do medio ambiente", afírmase.

"A industria da pesca quere ser e seguir sendo o que hoxe é: parte da solución ao cambio climático, non parte do problema, pero para iso necesita os instrumentos adecuados", advirte o manifesto. "A nós impórtanos a pesca, non nos conformamos con mirar para outro lado ante os seus problemas", agrega.

"Esiximos que a Comisión Europea continúe defendendo ao conxunto do seu sector pesqueiro contra quen quere acantonalo con intereses pouco transparentes", reza a declaración.

A conselleira do Mar, Rosa Quintana, na firma dun manifesto que apoian unha trintena de asociacións en defensa da pesca. XOÁN CRESPO | Fonte: Europa Press