Traballadores de Celtic Estores Bandalux, en Moraña, denuncian "condicións inhumanas" e "ditatoriais"
Alertan de que realizan xornadas de 10 horas a 40 graos con descansos de 15 minutos que se descontan das vacacións.
Por Europa Press / Redacción | Santiago de Compostela | 05/07/2022 | Actualizada ás 17:23
O comité de empresa de Celtic Estores Bandalux, no concello pontevedrés de Moraña, compareceron este martes en rolda de prensa para denunciar as "lamentables condicións inhumanas, insalubres e penosas de traballo" que, aseguran, padecen a maioría dos 250 traballadores empregados nesta fábrica.
Celtic Estores Bandalux dedícase á elaboración de toldos, persianas, estores ou cortinas, entre outros elementos. Un traballo que o persoal describe como "penoso" por ser repetitivo, con tarefas sempre realizadas de pé, ao que suman "picos de temperatura na nave de ata 40 graos".
O delegado de UGT, José Eiras, e a delegada de Comisións Obreiras, Pilar Mosquera, explicaron que obrigatoriamente teñen que facer xornadas de traballo de 10 horas continuadas cun mínimo descanso intermedio de 15 minutos, retirados das vacacións. "Somos persoas e temos familia, non somos nin números nin máquinas", lembraron estes representantes do comité de empresa.
Ademais, engadiron que xa hai compañeiras de baixa con cadros de ansiedade provocados pola presión á que son sometidas cun control continuo de rendibilidade en diferentes seccións desta factoría. Segundo sostiveron, a nova dirección de Bandalux "móstrase nunha posición en todo momento ditatorial", e sinalan o director xeral, Miguel Comesaña, por "ameazar con despedimentos a todo aquel que non obedeza os seus caprichos".
Concretamente, relataron que este directivo lles advertiu que presentaría un ERE extintivo que afectaría a 26 traballadores e convidou o persoal a abandonar a empresa se non aceptaban as condicións.
A continuación, relata que implantou as bolsas de horas obrigatorias co horario laboral de dez horas continuadas a partir do 21 de xuño e, polo menos, por un período de mes e medio. Estes traballadores apuntaron que a empresa ten unha carteira de pedidos que rexistra un constante incremento na produción.
O comité de empresa trasladará a situación actual ante a Inspección de Traballo e iniciarán mobilizacións nas próximas semanas no caso de que non se estableza o diálogo por parte da empresa.
Esixen a supresión de bolsa de horas obrigatoria, contratación de persoal necesario e o pago de horas extraordinarias segundo convenio.
