Luís Seara repite como candidato do BNG á Alcaldía de Ourense para deixar atrás "o ruído"
Ana Póntón presentou a Seara como o alcalde que "Ourense necesita para deixar atrás a páxina máis triste da súa historia" e "mirar ao futuro con esperanza, con ilusión e confianza".
Por Europa Press / Redacción | SANTIAGO DE COMPOSTELA | 06/07/2022 | Actualizada ás 18:41
O Bloque Nacionalista Galego proclamou ao seu actual portavoz municipal en Ourense como candidato á alcaldía nas eleccións de 2023. "Luís Seara é o alcalde que Ourense necesita para abrir un tempo novo", dixo a portavoz nacional da formación, Ana Pontón, que acompañou ao candidato no seu acto de presentación.
Pontón presentou a Seara como o alcalde que "Ourense necesita para deixar atrás a páxina máis triste da súa historia" e "o ruído", e tamén para "mirar ao futuro con esperanza, con ilusión e confianza". Así, dixo que o portavoz municipal do BNG ten "Ourense na cabeza e no corazón" e que, ademais, conta cun gran equipo de traballo que o apoia e unha organización forte e unida para "propiciar o cambio real na cidade".
Ademais, manifestou que dá por "empezada a conta atrás para recuperar Ourense" e "colocalo no lugar no que corresponde, no de ser unha capital de vangarda que xere riqueza e emprego da man do BNG". Para iso, presentou un proxecto de cidade, que trasladará ao longo dos próximos meses, pero do que avanzou as cinco grandes ideas fortes.
"CONCELLO DE AUGA"
A primeira desas liñas estratéxicas pasa por destacar o potencial de Ourense como "Concello de auga", desde o termalismo ata a xestión do ciclo da auga, "un factor de dinamización económica e turística". A segunda, facer de Ourense "un concello en movemento e transformación, unha cidade máis humanizada e accesible", que aposte tamén pola conexión comarcal.
Ademais, Pontón explicou que a terceira liña é a baseada na cultura, a creación, o ámbito artístico e o deportivo; "devolverlle á cidade o pulso artístico e cultural que nunca debeu perder porque a cultura é un motor económico e de xeración de emprego". As outras dúas liñas teñen que ver co ámbito social e o sustentable. No primeiro planean un "Ourense acolledor, feminista e igualitario", mentres que na última liña reforzan a idea dun "concello sustentable, ecoloxista, ambientalista e cun modelo sustentable de xestión de residuos".
Tras explicar as cinco liñas do proxecto, Ana Pontón sostivo que en maio de 2023 "esta cidade ten a oportunidade de escoller un novo goberno que lidere desde a humildade, pero tamén desde o convencemento con confianza e con rigor". "Luís Seara é o alcalde que Ourense necesita para recuperar o orgullo e poñer en marcha todo o enorme potencial que ten, facendo un lugar mellor para vivir, traballar ou simplemente visitar. É o alcalde que Ourense necesita para abrir as portas do Concello de par en par, sacar as tebras e deixar que entre a luz", aseverou.
"NAMORADO" DE TODO OURENSE
Pola súa banda o candidato á alcaldía asegurou ser un "namorado" do concello, tanto da parte máis urbana como da parte máis rural, así como do seu patrimonio, a súa cultura e a súa paisaxe, pero resaltando por encima de todo "á súa xente". Proclamou que "Ourense é o centro do mundo porque é unha potencia creativa capaz de producir cousas novas que se exportan ao resto do mundo", polo que aproveitando ben os recursos asegurou que "se podería provocar un xiro copernical que situaría Ourense na vangarda".
Entre eses recursos mencionou os patrimoniais e culturais, un sector no que insistiu, "se xera valor engadido e contribúe a aumentar o produto interior bruto", pero tamén resaltou os recursos comerciais e o "enorme potencial turístico" sempre desde unha perspectiva sustentable.
Ademais puxo o foco na necesidade de non dar as costas á área metropolitana e na aposta por mellorar a coordinación de servizos públicos, ao manifestar que dos 137.000 habitantes da área o 77% vive na urbe e, na mesma, aludiu á deterioración do centro urbano como un dos problemas aos que prestará atención se chega á alcaldía.
"SETE ANOS CATASTRÓFICOS"
Así mesmo, Luís Seara tivo palabras para o actual goberno municipal e asegurou que foron "anos catastróficos para a cidade" e que é o momento de "romper a dinámica" de Jácome e o Partido Popular que son as dúas caras dunha mesma moeda", motivo polo que dixo que se necesita "un novo punto de partida e hai que reiniciar o Concello".
