Ollo se viaxas en tren a Madrid: suspendidas todas as circulacións por un incendio en Zamora
Por Europa Press / Redacción | Zamora | 18/07/2022 | Actualizada ás 13:11
O incendio iniciado en Losacio (Zamora) obrigou a suspender "ata novo aviso" a circulación da liña de Alta Velocidade Madrid-Galicia, en concreto no tramo comprendido entre o municipio zamorano de Otero de Bodas e a capital da provincia.
Segundo informou Renfe, os trens afectados ata o momento son o Alvia 4064 Ferrol-Madrid e o Alvia 4105 Madrid-Ourense. En todo caso, a compañía asegurou que xa se estableceu un plan de transporte alternativo por estrada entre Zamora e Sanabria para os viaxeiros dos trens afectados. Nun comunicado, Renfe sinalou que os viaxeiros poderán continuar desde Sanabria a viaxe en tren ata chegar ao seu destino final.
Así mesmo, lamentou as molestias ocasionadas por esta situación e asegurou que informa da evolución desta incidencia a través da megafonía de estacións e trens, así como mediante persoal de atención ao viaxeiro e nos seus perfís de redes sociais.
