O Sindicato Labrego pide "soberanía" para Galicia fronte ao "avance do capitalismo neoliberal"
O SLG afea á Consellería do Medio Rural o seu aliñamento "co 'lobby' agroindustrial", á vez que lamenta as "portas xiratorias" entre a Consellería de Medio Ambiente e as empresas eólicas.
Por Europa Press / Redacción | SANTIAGO DE COMPOSTELA | 25/07/2022 | Actualizada ás 18:38
O Sindicato Labrego Galego-Comisións Labregas (SLG-CCLL) tamén se manifestou este luns 25 de xullo polas rúas de Santiago para reivindicar "soberanía" para Galicia fronte ao "avance do capitalismo neoliberal" e as elites económicas "a nivel mundial". A través dun comunicado, a organización denuncia a "alarmante conivencia" das administracións públicas cun modelo de desenvolvemento "capitalista" que "está a impactar directamente sobre a vida das persoas e do planeta no seu conxunto".
No caso de Galicia, o SLG afea á Consellería do Medio Rural o seu aliñamento "co 'lobby' agroindustrial", á vez que lamenta as "portas xiratorias" entre a Consellería de Medio Ambiente e as empresas eólicas. Neste mesmo contexto, criticou que o Goberno de España busque eliminar o "dereito á participación pública" en proxectos de negocio "lesivos para o medioambiente".
Así mesmo, o Sindicato Labrego advirte de que este 25 de xullo chega cos produtores de alimentos "loitando cada día contra un intencionado abandono" das institucións, a pesar de que levan "décadas alertando dos riscos de depender de insumos e alimentos producidos a miles de quilómetros", así como "medidas" que permitan alcanzar a "soberanía alimentaria".
"Chegamos ao Día da Patria Galega cun país no que os servizos de extinción de incendios son planificados en función dos intereses económicos de fondos de investimento estranxeiros. Cun país no que a poboación ten que defender as súas vivendas e as súas terras da expropiación forzosa coa que a Xunta quere participar no negocio do oligopolio enerxético internacional", lamenta o SLG.
