A "estabilización" de interinos nos concellos galegos, cada vez máis preto
Fegamp e sindicatos asinan un acordo orientativo para facer cumprir a lei do Goberno con liñas comúns.
Por E.P. | SANTIAGO DE COMPOSTELA | 02/08/2022 | Actualizada ás 14:30
A Federación Galega de Municipios e Provincias e os sindicatos UGT, CC.OO. e CIG, asinaron este martes un documento orientativo no que establecen uns criterios comúns para a elaboración das convocatorias de estabilización no emprego público local de Galicia e que ten como obxectivo servir de referencia a todos os concellos galegos á hora de cumprir coa Lei 20/2021 de medidas urxentes para reducir a temporalidade no emprego público.
Segundo explicou o presidente da Fegamp, Alberto Varela, este documento "non é unha obrigación", senón "unha orientación" para os concellos que queiran usar os criterios acordados. A pesar disto, cre que a resposta "vai ser boa", xa que os municipios "demandaban esta axuda" e asegurou que se respecta "a negociación colectiva e a autonomía local".
En todo caso, remarcou que ao ser un documento asinado polo tres sindicatos e pola Fegamp, "dá seguridade xurídica e compromiso moral para o proceso de estabilización". Ademais, destacou que os sindicatos tamén resolveron "dúbidas individuais de cada concello", polo que considera que "o máis fácil é aterse a estes criterios".
Entre as propostas, especifícanse detalladamente os méritos profesionais, formación e capacitación a baremar e recomenda que as distintas fases de selección non sexan excluíntes. Ademais, sinala que nos casos nos que unha persoa poida obter unha praza distinta da que ocupa, recoméndase que previamente se articulen sistemas de coordinación das administracións para realizar chamamentos simultáneos.
Neste sentido, recomenda tamén informar o traballador de que a praza que ocupa vai ser ofertada e, sobre os que poidan quedar fóra da administración tras o proceso, compensar con 20 días de retribución por ano traballado ata un máximo de 12 mensualidades sempre que teña participado no proceso de estabilización.
