Un aspirante a funcionario do Concello de Ourense di que o "minusvaloraron" por ser sindicalista

Volve a sombra do conflito a planear sobre o Concello de Ourense. Desta vez, o problema estaría nun aspirante que vén de recorrer o nomeamento dun alto cargo do consistorio:  a directora xeral de recursos humanos. Segundo destaca a a Federación de Atención á Cidadanía da Unión Sindical Obreira (FAC-USO), o aspirante, afiliado ao sindicato, vén de recorrer o nomeamento porque cuestiona o informe de valoración do Coordinador Xeral, do que se destila a escolla da nova directora. 

O recurso de reposición desta persoa anónima cuestiona o informe do Coordinador Xeral --que é, precisamente, director xeral de RRHH en funcións-- por varios motivos, entre eles que o propio Coordinador Xeral se debería ter abstivo e porque, segundo inciden, o informe do Concello tería "minusvalorado" a súa condición de sindicalista. 

Noutras dimensións, o recorrente asegura que os méritos presentes no seu curriculum non foron tidos en consideración de acordo á relevancia dos mesmos. Apunta así que conta con experiencia nun posto moi semellante nun concello canario e que, en conxunto, contaría con "maior experiencia profesional e formación máis variada que a aspirante seleccionada".

Nunha liña paralela, dende o sindicato inciden que a valoración do director en funcións "obvia" a superación de exames selectivos noutras administracións locais e os distintos postos polos que pasou a persoa que alega. Asemade, aseguran que o informe "conclúe que os funcionarios de Administración Local con habilitación de carácter nacional ostentan per se a Xefatura de Persoal, ao ser funcionarios de rango superior, aínda que de facto así actúen nos municipios medianos e pequenos".

A ollos do sindicato, "resulta sumamente criticable que, para unha xestión pública moderna, ao recorrente non se lle valorou o ter coñecementos transversais: habilidades sociais, igualdade de oportunidades, redes sociais, teleformación, comunicación, transparencia. FAC-USO espera que se estime o recurso do seu afiliado e, en consecuencia, lle sexa adxudicado devandito posto de traballo no Concello de Ourense".