O PSdeG levará a concellos e Parlamento iniciativas para loitar contra a trata e a explotación sexual

A secretaria de igualdade do PSdeG, Silvia Fraga, e a portavoz socialista desta área no Parlamento de Galicia, Noa Díaz, presentaron este venres unha batería de iniciativas e mocións que trasladarán tanto aos concellos como ao Parlamento para a penalización do proxenetismo e a loita contra a trata e a explotación sexual das mulleres.

Con motivo do Día Internacional contra a Trata e a Explotación Sexual, as socialistas defenderon en rolda de prensa unha declaración contra a trata de persoas e a prostitución, que entenden "como unha forma de violencia machista".

Á mantenta desa data, Fraga destacou a necesidade de loitar contra a trata con fins de explotación sexual, "unha vulneración dos Dereitos Humanos que vai da man da violencia, a marxinación e a dificultade económica".

A este respecto remarcou que España é o primeiro país de Europa en demanda de prostitución e o terceiro a nivel mundial, motivo polo que instou á sociedade e aos representantes públicos a "deixar de tapar as vergoñas".

Lembrou ademais que o PSdeG xa traballa neste ámbito para penar o proxenetismo a través da Lei de Liberdade Sexual no Congreso, polo que, relatan, buscan agora ampliar a actuación a nivel local e autonómico.

Neste sentido, Fraga tamén emprazou ao resto de formacións políticas "especialmente ás de esquerdas e progresistas" a que apoien a súa posición abolicionista para acabar coa prostitución, "que afecta sempre as mulleres máis pobres". "É incomprensible que no Século XXI continúe estando normalizada e consentida a explotación sexual das mulleres", insiste.

Pola súa banda, Noa Díaz criticou que non se coñeza o plan contra a trata no que traballa a Dirección Xeral de Igualdade da Xunta, que leva ademais "un atraso considerable e que xa debería estar en aplicación ao estar contemplado desde 2022 a 2024".

Respecto da problemática da trata e a explotación sexual das mulleres, apuntou que é preciso "camiñar cara a unha abolición total" dunha situación "que incumbe ás mulleres en situación de vulnerabilidade e de pobreza". "Sen abolición, non hai igualdade posible", concluíu.