Rueda lembra a "débeda de gratitude" dos galegos con Buenos Aires tras ser recoñecido como visitante ilustre

O presidente da Xunta, Alfonso Rueda, agradeceu este venres á Lexislatura da cidade autónoma de Buenos Aires o seu recoñecemento como visitante ilustre e lembrou que os galegos teñen "unha débeda eterna de gratitude" coa capital arxentina.

Durante a súa intervención, Rueda subliñou a "irmandade" existente entre Arxentina e Galicia desde hai décadas e fixo especial fincapé na excelente acollida que este país americano tivo cos galegos que emigraron ao longo do século XX.

Neste sentido, o titular da Xunta resaltou que a Galicia actual, unha Galicia "de liberdade, de benestar, de progreso económico e de oportunidades", non sería posible sen a pegada que cidades como Buenos Aires deixaron neses galegos.

Rueda subliñou que as relacións se manteñen agora grazas ao labor da delegación da Xunta en Arxentina ou con iniciativas para promover o retorno de galegos no exterior para que melloren a súa formación ou aposten polo emprendemento en Galicia.