Angrois- "Se o ERTMS estivera instalado tería freado o tren a tempo", di unha enxeñeira

A traballadora Natalia de la Torre, da empresa Thales --que, xunto a Siemens, encargouse do despregamento do 'ERTMS' na vía na liña Ourense-Santiago na que se produciu o accidente do Alvia--, afirmou que, de estar instalado este sistema de control da velocidade en toda a liña, tamén na zona previa á curva de Angrois, o tren "tería freado" antes de producirse o descarrilamento.

Durante o xuízo polo sinistro, que ocasionou 80 mortes e 145 feridos, esta técnica respondeu en primeiro lugar ao avogado da plataforma de vítimas, Manuel Alonso Ferrezuelo, que foi quen a propuxo como testemuña.

Ante a cuestión de que faría o 'ERTMS' en caso de estar instalado até a estación de Santiago e non até o quilómetro 80, como resultou tras unha modificación do proxecto que retirou o sistema da parte final do traxecto --onde está a curva--, apuntou que o tren "frearía".

Antes da curva da Grandeira, o maquinista debía afrontar unha transición de velocidade de 200 a 80 quilómetros por hora, o que se denomina un cambio significativo. Despois da traxedia, estes cambios foron indicados e asociados a balizas que frean o tren no caso de que o condutor non o faga.

A preguntas da avogada do estado, que representa a Adif, esta traballadora admitiu que "antes do accidente non" escoitara este termo de 'cambio significativo' de velocidade.

"Agora mesmo eu sei que hai balizas asociadas chamadas 'cambios significativos' de velocidade que entendo que axudan a xestionar este tipo de cousas (...) Nese momento descoñezo o que había", sostivo.

Na súa intervención, Natalia de la Torre explicou que ela era "responsable do sistema en vía" e non do 'ERTMS' embarcado, que foi o que se desconectou por fallos do software que xeraban interferencias.

En calquera caso, sinalou que "cando hai unha transición de 'ECTS' a nivel 0 (do 'ERTMS' ao 'Asfa', que en lugar dun sistema de control de velocidade continuo é puntual) pídese recoñecemento ao maquinista, que recoñeza o cambio ao nivel 0".

"Que ocorre se non o recoñece?", interrogou o letrado da plataforma de vítimas, ao que esta especialista respondeu que, entón, "aplícase o freado". "Indícase que se aplique o freado", insistiu.

"Sitúao espacialmente?", inquiriu a continuación o avogado Manuel Alonso Ferrezuelo. "Avisa ao maquinista de que vai coller outra supervisión", díxolle. Despois, sobre se retirar o 'ERTMS' dos últimos quilómetros do traxecto supuxo unha diminución de seguridade, evitou contestar de forma rotunda. "Descoñezo as razóns... Xa non vai ao amparo do sistema 'ERTMS' que é unha supervisión continua; vai ao amparo da sinalización lateral e o 'Asfa", constatou.

Si indicou, ante a insistencia das preguntas, que entende que "debe haber unha relación das razóns" cando se acomete un cambio e supón que hai que "analizalo", tamén en alusión á desconexión do sistema embarcado. "Depende un pouco da regulación, en que sentido e por que razóns e que era o que fallaba se fallaba algo", precisou.

TECNÓLOGOS

Por outra banda, dous tecnólogos da unión temporal de empresas (UTE) que forneceu o sistema 'ERTMS' na liña na que se produciu o accidente do tren Alvia afirmaron que, con el instalado en todo o trazado, o tren "frearía" antes da curva --onde se desubicou o maquinista-- e que o cambio de proxecto supuxo unha diminución de seguridade.

Durante este martes compareceu como testemuña Jesús García Muñoz, un técnico de Dimetronic (agora Siemens), que foi tamén preguntado por este extremo e cuestións similares. Sinalou que a UTE realizou dossier de seguridade da liña ata o quilómetro 80 e tamén do tramo que restaba ata a estación, aínda que había quen apostaba por elaborar unicamente un decálogo para este último.

"No caso de Santiago non" houbo intercambio de información con Ineco, o encargado de elaborar unha avaliación independente, segundo subliñou. Este técnico recoñeceu que o 'ERTMS' supón "unha mellora" de seguridade, polo que o avogado da plataforma de vítimas viu demostrado que, "en sentido contrario", quitalo foi unha diminución.