O artista Mario Cortizo participa nas 'Residencias Artísticas' da Deputación da Coruña
Por E.P. | A CORUÑA | 09/11/2022 | Actualizada ás 17:40
O Pazo de Mariñán, en Bergondo, acolle durante toda esta semana a terceira das estancias creativas programadas ao amparo das Residencias Artísticas que organiza o departamento de Cultura da Deputación da Coruña.
O percusionista e artista sonoro Mario G. Cortizo preparará o seu novo espectáculo, unha ponte entre a percusión tradicional e a música contemporánea. Na proposta, colaboran artistas galegos no ámbito da escenografía.
Mario G. Cortizo, a quen acompañarán estes días en Mariñán o dramaturgo Marc Rosich e a escenógrafa Ana Inés Jabares, recibirá a asesoría técnica de Andrea Jiménez, consultora de movemento e profesora no Conservatorio de Danza de Barcelona, entre outros profesionais.
