Canto gastará de media cada galego na lotaría de Nadal?
Lotarías e Apostas do Estado presenta unha campaña do Sorteo de Nadal con tres historias reais "co foco nos valores"
Por Europa Press / Redacción | SANTIAGO DE COMPOSTELA | 10/11/2022 | Actualizada ás 18:48
Os galegos gastarán de media 71,16 euros en comprar lotaría para o Sorteo de Nadal de 2022, o que supón 7,34 euros máis que a media española e unha subida de 3,54 euros por galego con respecto ao ano pasado, segundo a cifra de consignación por habitante da Sociedade Estatal de Lotarías e Apostas do Estado (Selae).
Esta cantidade fai referencia ás estimacións de venda que fai Selae á hora de enviar os boletos para o sorteo, que se celebra o 22 de decembro, ás administracións de lotaría. Os datos definitivos coñeceranse cando se reciban as devolucións de boletos non vendidos durante a campaña do sorteo.
Por provincias, estímase que os lucense son os que máis gastarán dentro da comunidade en lotaría de Nadal este 2022, ascendendo o gasto a 89,79 euros por persoa, o que supón 6,15 euros máis que en 2021. Así, os coruñeses desembolsarán 77,75 euros, un aumento de 5,42 euros con respecto ao ano pasado.
Na provincia de Pontevedra, Selae estima un gasto per cápita de 63,22 euros, fronte aos 61,82 de 2021. Á cola de gasto en boletos para o sorteo está Ourense, onde se calcula que o investimento será de 51,60 euros por persoa, 76 céntimos máis que o ano anterior.
Deste xeito, Lotarías e Apostas do Estado calcula que a poboación galega comprará un total de 959.052 billetes, a maioría deles na provincia da Coruña onde se estima a venda de 435.470 boletos.
O Sorteo de Nadal repartirá este ano en España un total de 2.520 millóns de euros. Entre os premios destaca o 'Gordo' de Nadal, de 4 millóns euros á serie; o segundo premio, de 1.250.000 euros á serie; ou o terceiro, de 500.000 euros á serie. O importe do décimo segue sendo de 20 euros.
A CAMPAÑA DO SORTEO NARRA TRES HISTORIAS REAIS
Doutra banda, Lotarías e Apostas do Estado presentou este xoves a campaña do Sorteo Extraordinario de Nadal, conformada por tres anuncios que narran historias reais baseadas na amizade, a inclusión social e a España baleirada
O presidente de Lotarías e Apostas do Estado, Jesús Huerta Almendro, sinalou que con esta campaña "vólvese a pór o foco nos valores". Así, destacou que "se fala de compartir, da unión ou da honestidade".
Nesta liña, explicou que nos anuncios nárranse as historias de "a inclusión social daqueles que teñen que deixar os seus países, da amizade inquebrantable, xa sexa na España urbana, na costeira ou na rural". Ademais, Almendro subliñou que a Lotaría de Nadal "vai máis aló do xogo" e que traballan para "axudar aos máis vulnerables ou en situacións de exclusión".
