A planta de transferencia de Sogama na Lama dara servizo aos concellos na primeira metade de 2023
Por E.P. | PONTEVEDRA | 16/11/2022 | Actualizada ás 20:41
O presidente executivo de Sogama, Javier Domínguez, acompañado polo alcalde da Lama, Jorge Canda, visitou este mércores no polígono industrial de Racelo as obras da futura planta de transferencia, que está previsto que dea servizo aos concellos da contorna no primeiro semestre de 2023.
A nova planta, adxudicada por máis de 1,8 millóns de euros e cofinanciada polos Fondos FEDER como resposta da Unión Europea á pandemia da covid-19, localízase nunha parcela de case 2.300 metros cadrados do polígono industrial de Racelo e contará cunha superficie construída duns 600 metros cadrados para dar servizo aos municipios da Lama, Cerdedo-Cotobade, Fornelos de Montes e Ponte Caldelas.
Con capacidade para máis 5.000 toneladas anuais de residuos urbanos, poderá transvasar tanto os envases lixeiros (bolsa amarela) como a fracción resto (bolsa negra) e, no seu momento, a materia orgánica (FORSU) recollida de forma diferenciada a través do colector marrón, en proceso de implantación en Galicia.
